JCI World President di 2018, señor Marc Brian Lim, a hasi un bishita kòrtiku na Kòrsou.
Durante di e bishita akí el a topa ku miembronan, papia ku partner nan lokál i tambe liderá un foro chikí riba e tema di Sustaiable Development Goals. Señor Lim ta e di 3 presidente Mundial ku ta pasa Kòrsou den e ùltimo 5 añanan, pues su bishita ta algu uniko pa e organisashon.
Durante di e enkuentro ku miembronan el a elaborá riba e poder di Suidadania Aktivo den un komunidát i kon suidadánonan miembro i no miembro di JCI por duna di nan parti pa krea un miho pais. Miembronan di JCI regularmente ta partisipá na enkuentronan similar pa engrandesé nan konosementu riba strategianan pa krea kambio, i tambe atkerí abilidat pa implementá esakinan. E kontribushon di sr. Lim sin duda ta trese dimenshonnan nobo pa e partisipantenan, ya ku el a kompartí su eksperenshanan den su karera komo miembro di e organisashon.
JCI Dutch Caribbean ta un organisashon nashonal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat. JCI Dutch Caribbean ta konsisti di 6 kapitulo lokal reparti riba e isla nan Aruba, Bonaire i Korsou. Total e organisashon ta konsisti di mas di 150 miembro aktivo reparti riba e kapitulo nan JCI Willemstad, JCI IOBA Curacao, JCI CLIC, JCI UC (na Korsou), JCI YALA (na Aruba) i JCI YUB (na Bornaire).
Pa mas informashon tokante di e trabou nan di e diferente kapitulo nan i e trabou ku e suidadano nan aktivo ta hasi den nos komunidat, bishita e facebook page di kada un di e organisashon nan menshona. Despues di e bishita na Korsou, Preisdente Lim lo sigi ku su tur mundial kaminda e lo bishita varios pais mas prome ku fin di aña.
