Minister Andin Bikker durante e conferencia di prensa a splica cu tin falta di claridad riba e asunto di Asilo Politico cu tin biaha, manera cu a sosode na Mei ultimo, tabata tin dos dia caminda cu tabata tin diferente persona, bao di informacionnan eroneo cu a acudi na Dimas, pa purba di aplica pa bin na remarca pa asilo politico, cu a causa un consternacion.
E mandatario a splica cu articulo 19 di e Toelatingsbesluit, ta bisa cu ora yega Aruba y e ta sali tambe, sea na aeropuerto of na un waf oficial y no ora cu drenta via botonan ilegal. Eynan tin cu duna di conoce cu bo kier proteccion a base di nos tratadonan. Na Mei, bao di informacion eroneo, personanan a crea speransa cu nan lo bin na remarca a base di nos tratado cu no ta skirbi pa nan y ya cu ta aki nan caba, sea como turista of a nenga nan permiso, a pensa cu nan lo por bin na remarca pa asilo politico. A base di esey tabata tin como 133 cu a manda carta aden, cu a purba di bin na remarca. Pero obviamente nan tabata na Aruba caba. A base di nos leynan vigente no a bisa na yegada cu nan mester di asilo politico y ora cu nan tabata aki caba como turista of cu nan permiso a wordo nenga, etc. y/of tin di nan hasta a drenta na un manera ilegal via nos costanan, cu no ta wafnan registra, a bay purba e ora di bay aplica pa asilo politico. Esey ta e mal informacion cu tabata tin cu a crea speransa falso cerca diferente persona. Nos leynan ta hopi cla riba esaki. Ora bo yega, “bij aankomst”, inmediatamente, sea na waf registra of na aeropuerto, bo mester duna indicacion, pasobra e ora ey caba bo mester por tin miedo pa bo siguridad, bo ta wordo persigui politicamente, of ora bo ta na Aruba riba beach, bo ta bay haya e miedo eynan.
Mal informacion
Ta lamentabel cu mal informacion a wordo duna. Mester clarifica diferente cos pasobra ta via entrada legal por bati alarma pa asilo politico. Tin personanan eyfo, cu bao di e mal informacion eynan a crea speransa cu nan lo por bin na remarca a base di tratadonan internacional. Minister Andin Bikker a splica cu tin hende largo tempo aki y a pidi pa asilo politico. Tin di nan tin hopi luna of mas cu un aña. Tin di nan cu nan permiso a wordo nenga, e ora nan a pensa cu door di e mal informacion aki, nan por opta e ora pa busca asilo politico. Hopi di e hendenan aki cu a pidi no ta cumpli cu e rekisitonan pa asilo politico. Gran mayoria ta personanan cu ta busca un tipo di refugio economico segun e mandatario Andin Bikker. Corsou, Boneiro, Colombia, varios pais den cercania rond di Venezuela, cu ta pasando den momentonan hopi dificil socialmente mira. Ta trata aki di un migracion meramente economico. Asilo politico, den gran mayoria aki no ta aplicabel, segun minister Bikker.
Formulario na Dimas
A mustra minister Andin Bikker pa splica riba e motibo cu ta haya e documento di Asilo Politico na DIMAS? Tin diferente motibo pakico DIMAS tin formulario. Segun e mandatario, Dimas tin un tarea pa atende cu e aplicacion di asilo politico. Si un persona yega Aeropuerto y aplica, ta Dimas ta tuma e aplicacion. E ora Dimas ta sigui trat’e tambe.
Fuera di esaki e mandatario a splica cu ta bay reorganisa esaki. Tin un intencion di centralisa esaki, pasobra e asunto di Asilo Politico ta un autoridad comparti cu e tin un aspecto cu e ta Buitenlandse Betrekkingen, esta di diplomacia exterior. Y e tin aspecto di admision. E bottomline ta esey ta e splicacion pakico Dimas tin e formularionan.
Aruba como pais, ta hopi tempo cu a wordo confronta cu un fluho di personanan cu ta basicamente laga nan pais pa motibonan economico, door di problemanan economico y social. Ta algo cu awor aki ta haya e fluho aki. No ta pais Aruba so, pero Corsou, Boneiro, Colombia, entre otro. Nan tambe tin un indice hopi halto di persona cu ta yega eynan pa motibo di e exodo cu tin awor aki for di Venezuela.
Den pasado ta un biaha pa aña of dos biaha pa aña ta aplica pa asilo politico. Awor a bin e mal informacion cu a tuma luga, a pone tambe cu hopi persona a haya un speransa falso y a bay aplica. Nos leynan ta hopi duidelijk riba esaki. Articulo 19 ta bisa cu ora cu yega na frontera, sea na aeropuerto of na un waf registra.
