Debi na un fayo cu e generator di coriente na Aeropuerto Internacional Reina Beatrix, cu Aruba Airport Authority a hay’e ta paralisa henter e terminal y para tur proceso, mientras cu a evacua tur pasahero for di e edificio.
Mesora a start un investigacion pa mira kico a pasa cu e generator y dicon e no a activa na momento di e blackout. Airport ta purbando tambe pa bin cu un “mitigation plan” pa por garantisa y sigura cu nan tin “back up” ora coriente bay.
Siguridad di su pasaheronan, empleado y usuario di aeropuerto ta e prioridad number un pa Aruba Airport Authority. Pero sin coriente, nan no por garantisa un operacion sigur na aeropuerto y como tal a opta pa para tur proceso.
Mester menciona cu, debi na e decision di gerencia di aeropuerto pa saca tur hende afo y paralisa operacion, cu a desvia varios vuelo cu tabata biniendo Aruba. No ta conoci si e vuelonan aki lo bin mañan awo, pasobra ta turistanan cu ta pendiente pa bin vakantie of bin traha na Aruba cu awor ta pega na Republica Dominicana, por ehempel. Cuanto vuelo a desvia y no a bin Aruba, no ta menciona den e relato di aeropuerto.
Ta pendiente pa sa tambe con regular ta “service” e generator y ta garantisa cu e ta funciona bon. No por imagina cu Aruba Airport Authority a fia mas of menos mey biyon florin pa e proyecto Gateway 2030, anto no tin un bon generator den dje. Awendia, cualkier restaurant tin un generator pa por sigui opera ora coriente bay, pues ta incomprendibel cu nos aeropuerto no ta capas pa maneha un generator. Ta tres luna pasa tabatin un blackout, pues ta con e generator por a daña den apenas tres luna di tempo.
Aruba Airport Authority ta pidi disculpa pa tur inconveniencia cu e incidente aki por a causa y ta gradici henter e “Airport community” pa nan asistencia inmediato pa yuda coordina y specialmente na tur pasahero pa nan comprension y cooperacion.
