Segun lider di CURPA, Aruba a drenta su Status Aparte cu retonan grandi. E cierre di nos refineria tabata un sla duro pa nos pueblo di Aruba paso nos economia a cay den otro. Hopi no a kere cu Aruba lo por logra lanta cabes y a bandona nos isla pa busca un mihor futuro den exterior. E reto tabata grandi y despues di cu hopi sacrificio economia di Aruba a bounce back di tal forma cu nos tabata wordo mira como ehempel pa motibo di un economia red hot.
Enbes di traha dam warda awa pa enfrenta e retonan nos dilanti, nos flamante politiconan a prefera di hasi (ab)uso di e oportunidad pa desgracia nos Isla cu malgastamento di fondonan publico. Ta obvio cu nan unico interes tabata nan propio beneficio y di partido y no di Aruba dushi terra nos barranca tan stima.
Si partido avp a hisa nos debe nacional partido mep tampoco a keda atras paso nan tambe a hasi mesun cos. Si na aña 2017 nos debe national tabata rond di 72% awe den 2022 nos debe national ta 128% di nos GDP. E gobernacion actual lo tira culpa riba e pandemia, pero ta lubida cu prome cu e pandemia ya caba un “aanwijzing” tabata colga riba cabes di nos gobierno pa motibo di mal gobernacion. Esaki ta dunabo di compronde cu nan no por tira piedra sconde man paso nan no ta miho cu nan tampoco.
Nos por mira cu partidonan politico cu a vota contra leynan di Dios awe ta cosecha y ta biba locual cu nan a sembra y ainda falta. Nos por mira partido mep tuma un postura di dictador y tin sosten di un partido manera Raiz cu ta manera un appendix paso e ta un partido sin funcion den e coalicion. Un otro partido cu lo pasa pa historia pa no a cumpli cu nan promesa prome cu elecion. Awe nos por mira cu e toren su luz no ta briya mas y poco poco su luz ta bay pagando.
Nos di partido Curpa ta kere cu awor mas cu nunca a yega e momento pa hunto nos construi un fundeshi nobo y un fundeshi solido. Un fundeshi basa riba principionan unda norma y balor ta bin na prome lugar. E unico manera pa esaki lo pasa ta si pueblo di Aruba bisa basta na partidonan politico tradicional.
Nos pueblo di Aruba a traha duro y a sacrifica y awe nos por mira nos sacrificio tabata por nada paso nos politiconan tradicional no a sa di gobierna nos isla cu integridad. Nos politiconan mester compronde cu nan a wordo elegi pa goberna y cu nan ta un simpel administrador di patrimonio di pueblo di Aruba y no ta doño di patrimonio di pueblo di Aruba. E lema di partidonan comunista/socialista/liberal ta cu pueblo mester keda sin nada pa pueblo ta feliz y biba na merced di un gobierno comunista. Actualmente pueblo di Aruba ta esclabo di debe pa mal maneho di tur e gobierno nan te na esun actual. Solamente pueblo por salba e pueblo y por trese e cambio. A jega tempo pa pone pueblo di Aruba su bienestar mester bin na prome lugar.
