Dialuna merida, Sindicato di Polis (SPA) awa a pasa hariña y nan a dicidi di bay reuni cu nan miembronan. Nan ta cansa di e situacion di schimmels den ward’i polis na Oranjestad, cual ta causa cu varios di e agentenan ta bira malo.
Pero un otro preocupacion grandi di nan tabata e echo cu ta den pleno temporada di Carnaval y nan ta trahando sin e bulletproofvest. Ta preocupacion grandi, cual a haci cu nan ta masha rabia. Nan tabata pidiendo presencia di Minister di Husticia, Rocco Tjon.
Den henter e situacion aki, SPA a haya un yamada di Altocomisario, drs. Ramon Arnhem pa bin sinta na mesa y nan dialoga hunto, pa asina hunto yega na un solucion. Rolando Maduro, vice-presidente di SPA, a cuminsa na bisa cu relaciona cu henter e situacion di malcontento di dialuna, nan a ricibi un invitacion pa dialogo for di Altocomisario, drs. Ramon Arnhem.
Tabata un dialogo pisa, pero na final a keda di haci un afspraak cu minister, pa sinta hunto. Nan a indica cu nan a ricibi un invitacion caba di parti di e minister, pa cual nan mester contesta esaki tambe ainda. Segun Maduro, e lo kier pa e minister compronde cu si e mes no ta traha den e ambiente ey, e no por sa kico e problema ta.
Mas aleu, Rodney Solognier, Presidente di SPA, a bisa cu nan tin algun idea encuanto mudamento di Ward’i Polis cual nan a trece dilanti den e dialogo, pero nan no kier bisa nada ainda ya cu nan kier duna Altocomisiario Arnhem e oportunidad pa un solucion, ya cu e edificio di Ward’i Playa no ta apropia mas pa traha den dje. Nan no kier desvia di e idea cu nan a trece dilanti.
