MAS: Ombudsman lo ta un soldaat sin municion

Marisol Lopez-Tromp, parlamentario y lider di Fraccion M.A.S., a cuminsa na bisa cu locual a trata ta un iniciativa di ley di tres miembro di Parlamento cu ta Edgard Vrolijk, Shaiiliny Tromp-Lee y Misha Raymond. E tres parlamentario a scoge pa bin cu un cambio den un ley cu Parlamento a pasa mas o menos dos aña y mey pasa. Lopez-Tromp a comenta cu eigenlijk ombudsman ta algo cu mester ta regla den constitucion, locual a mira dialuna den Parlamento ta cu tres parlamentario so ta bin cu un iniciativa sin consulta cu tur otro parlamentario.

E lider di Fraccion M.A.S. a comenta cu mester corda cu esaki no ta djis un ley cu di un dia pa otro por bisa cu kier cambia. Ta trata di un ombudsman pues un defensor di pueblo cu tur hende mester sostene.

Na ningun momento a tene un reunion cu e comision pues e djis yega pone riba agenda sin dialoga. Ademas di esey e ombudsman cu lo traha a base di e ley aki cu no ancra den constitucion lo bira manera un soldaat sin municion. E ombudsman lo bira un persona cu lo traha riba su steenchi pasobra e no ta hinca den hoogcollege caminda e tin proteccion y su funcion tin autoridad.

Awo su begroting lo depende di e begroting di Minister-president Evelyn Wever-Croes, mescos cu Parlamento, caminda cu cada bes cu Parlamento kier haci uzo di su propio presupuesto e ta depende di e aprobacion di minister-president. Esaki ta pone cu e Parlamento no ta independiente.

Cada bes cu mester di personal nan ta depende for di Conseho di Minister pa aproba e desicion. Aruba ta e ultimo pais pa independisa Parlamento. E ombudsman lo mester ta critico riba Gobierno su departamentonan y awo kier regl’e den un landsverodening.

“Nos tur kier pa e ombudsman ta bon regla y nos a bisa esey bon cla”, Lopez-Tromp a comenta. El continua bisando cu e ombudsman mester ta regla den constitucion sino e no lo tin sentido.

Pa Marisol Lopez-Tromp ta importante pa e ombudsman sintie sigur den su funcion y no unicamente riba papel sino tambe ancra den constitucion.