Dialuna atardi a tuma lugar na Centro Deportivo Libertador Betico Croes, weganan di Beach Volleyball categoria 4 (naci 2006- 2007) y categoria 5 (naci 2003-2005) mucha muher, organisa pa IBiSA. Siguiendo cu reglanan di protocol presenta pa IBiSA/DVG, weganan a cuminsa den un bon ambiente. E diamars prome, dia 9 di maart tabata tin training na Joe Laveist Sport Park y diaranson dia 10 di maart tabata tin training na Centro Deportivo Libertador Betico Croes, tur dos bou guia di Sr. Percy Phelipa.
Diabierna 12 di maart weganan di clasificacion a tuma lugar tanto na Joe Laveist Sport Park como na Centro Deportivo Libertador Betico Croes y aki e mihor 2 scolnan di cada categoria di districto a pasa pa e gran final cu a tuma lugar dialuna dia 15 di maart.
Prome wega tabata den categoria 4 unda cu Colegio Arubano a enfrenta Colegio San Augustin. Den prome set ekipo di Colegio Arubano a gana cu score di 21-19, den di dos set Colegio San Augustin a gana cu score di 21-16 forsando asina e di tres set. E di tres set tabata uno hopi emocionante y hopi pareu den score te na 11-11, despues Colegio San Augustin a rally pa bay cu e victoria cu score di 15-11 y asina a titula campeon den categoria 4 lagando Colegio Arubano como sub campeon.
Despues a tuma lugar final mucha muher categoria 5 unda cu Abraham de Veer School a enfrenta Colegio San Nicolaas. Sigur tambe tabata un wega emocionante pa ambos scol cu a keda duna apoyo te na final di wega. Prome set Abraham de Veer School a gana 21-15, den di dos set Abraham de Veer School a logra bay cu e titulo di campeon cu e score di 21-10, lagando Colegio San Nicolas cu e titulo di sub campeon. IBiSA ta felicita tanto campeon y sub campeon di e torneo aki y kier a gradici y felicita tur esnan cu a sigui regla y protocol di IBiSA/DVG pa e torneo aki por tabata un exito. Un gradicimento tambe ta bay pa Aruba Volleyball Bond cu a guia y dirigi e weganan aki.
