Dialuna prome di maart Centro di Bario Savaneta a ranca sali cu un programa di actividad nobo pa 2021. Desde cu obligatoriamente mester a cera portanan y cancela tur actividad door di e pandemia mundial, e centro a habri su portanan bek.
A habri cu un directiva nobo y un coordinado di actividad nobo; ta cla pa ofrece omunidad di Aruba, en particular di e bario di Savaneta, un programa varia y pa tur edad. Coordinado di actividad pa Centro di Bario Savaneta ta Roseline Manna.
E tin amplio experiencia den organisa actividad, den desaroyo di proyecto y traha cu boluntario. Su meta a corto plaso ta pa por trece bida bek den Centro di Bario atrabes di diferente tipo di actividad pero tambe pa brinda oportunidad pa comunidad mes bin cu nan idea pa proyecto/actividad. E meta pa largo plaso ta pa haci Centro di Bario Savaneta uno sostenibel.
E idea di e programa nobo ta pa brinda consistencia den e programacion di siman. P’esey tin un actividad general tur dia den siman. Di e manera aki por sa exactamente kico ta ofrece y por planea pa atende esaki di antemano. Riba dialuna, diamars y diahuebs lo enfoca riba cursonan pa mucha y adulto; esaki lo varia entre EHBO, programa pa Tata, les arte, teatro, deporte y mucho mas.
Diaranson muchanan di edad 4 pa 12, por participa cu Sport en Spel, esaki lo ta di 3or pa 5or pm. Esaki ta organisa pa lidernan cu experiencia den weganan recreativo. Riba diaranson anochi lo tin encuentro informativo; pa esaki lo ta colaborando cu diferente organisacion social cu lo comparti cu e participantenan area di experticio. Riba diabierna lo tin actividad recreativo, por ehempel anochi di pelicula.
Aparte di e programa general lo tin diferente otro curso/workshop/les tumando luga na Centro di Bario Savaneta.
‘Like’ e Facebook page: Centro di Bario Savaneta y click ‘Follow’ p asina sigui nan y keda na altura di tur e actividadnan. Lo comparti detayenan di e curso, dia di inscripcion como tambe prijs pa e actividad. Pa mas informacion di actividad, por manda un email na [email protected] of tuma contacto cu Roseline via whatsapp na 569-3900.
Sigur lo tene bon cuenta cu tur rekisito stipula pa DVG pa cu COVID-19. Ta haci e Centro limpi frecuentemente y ta ekipa cu hand
sanitizer na tur entrada. Ta pidi tur bishitante pa bisti tapaboca ora di bishita e centro y mantene nan mes na tur regla vigente.
