Riba diabierna 2 di juni a tuma luga un ehercicio, den cual e 6 islanan di e parti Caribense di Reino a participa. Meta di esaki tabata pa practica pre-evacuacion di e pashentnan di Saba, Sint Eustatius y Sint Maarten den caso di un crisis di horcan. E responsabilidad principal pa continuidad di cuido p’e islanan BES ta asigna na cuido y Hubentud Hulanda Caribense (ZJCN) di e ministerio di VWS. Como cu ta existi un dependencia geografico entre Saba, Sint Eustatius y Sint Maarten, e cooperacion ey a forma e base di e ehercicio aki cu desviacion p’e islanan abou.
Diferente instituto medico y organo di gobierno riba e seis islanan a participa n’e ehercicio. Nan ta Fundashon Mariadal (Boneiro), Sint Maarten Medical Center (Sint Maarten), Horacio Oduber Hospital (Aruba), Curaçao Medical Center (Corsou), Queen Beatrix Medical Center (Sint Eustatius) y SabaCares (Saba). Ministerio di Salud Publico, Desaroyo Social y Labor di Sint Maarten, e ministerionan Hulandes BZK y VWS y Representacion di Hulanda na Aruba, Corsou y Sint Maarten tambe tabata representa a base di nan propio responsabilidad den caso di pre-evacuacion medico.
Na 2022 secretario di estado di VWS y e ministernan di salubridad di e paisnan a dicidi di amplia e cooperacion medico y practica entre e islanan. Un di e partinan importante di e cooperacion ey ta trata pre-evacuacion medico. Pre-evacuacion medico ta esencial den caso di un (menasa di) crisis pa por garantisa continuidad di cuido, ora e ta na peliger den ora e siguridad fisico ta afecta (manera den caso di un horcan). Of den caso cu un crisis causa scarsedad na recursonan y/of personal medico disponibel.
Historia ta siña nos ki impacto un horcan por tin riba poblacion di e isla. E ehercicio aki ta un stap importante pa ta miho prepara durante temporada di horcan y pa fortalece e cooperacion entre tur e islanan den Reino, cu den caso di crisis hopi biaha ta depende di otro.
