Diahuebs hues a hala atencion di Julia Turnbull, kende a duna Aruba un mal nomber. El a horta pertenencianan di un turista. E tristo den e caso aki ta cu no ta prome biaha e ta haya su mes envolvi cu husticia. Ministerio Publico a acus’e cu den luna di februari el a comete robo di airpods, charger y un cadena. Tur esaki tabata pertenece na un turista cu a bin disfruta di Aruba su Carnaval pero a keda cu un sabor amargo di su estadia.
Julia ta nenga di a comete e robo y ta bisa cu ta simplemente e prome dia e no a haya un hende pa entrega nan e material y despues el a lubida. E ta nenga cu el a haci uzo di un yabi falso, manera e acusacion ta bisa, pasobra esey ta e yabi cu el a ricibi for di su hefe pa haci limpiesa den e cambernan. E ta traha dos trabou di mantencion na diferente hotel. E echo aki a tuma luga na un hotel renombra. E ta bisa cu e tabatin cuater camber pa haci limpi y e ta coy e sheetnan, lora nan y tira nan den baki. E no a mira cu tabatin algo den un di e sheetnan. Tabata ora cu el a bay haci e baki limpi, e cosnan aki a cay y e no tabata sa mas di cua camber e sheet tabata.
E turista cu a haci e denuncia ta bisa cu el a laga e cosnan aki riba su cashi y e airpods cu su charger tabata den nan caha riba mesa. Pero e acusado ta bisa cu esaki no ta berdad. “Kizas e homber tabata burachi y no ta corda cu ta riba e cama el a laga nan tira”, el a bisa. Echo ta cu na momento cu e polisnan a haya e airpod y su charger berdad den nan caha poni.
Julia a splica hues cu e tabata pura e dia cu el a haya e cosnan ey den e sheetnan. El a dicidi pa bay cas cu nan pa entrega nan e siguiente dia. Pero e siguiente dia su supervisor no a traha. Dialuna e turista a haci denuncia cu a horta material for di su camber. Loke cu ta hunga un rol contra dje tambe ta cu ora a puntr’e si el a haya un cadena, el a nenga pero a haya e cadena den su tas tambe.
E biaha aki hues a dun’e 60 ora di trabou pa comunidad y un luna condicional, mas dos aña di prueba. E señora a bandona sala na yoramento y tabata insisti cu e ta inocente.
