Felix Dominico Geerman tabata den corte diabierna mainta pasobra ta acus’e di a comete varios delito. Aunke cu a cuminsa cu tratamento di e caso na final a pospone, ya cu un di su abogadonan a pidi pa laga un rapport di psikiatra, manera cu Reclassering tambe a pidi.
Geerman di 35 aña tabatin seis acusacion contra dje y a presenta cu cinco abogado. Practicamente un abogado pa cada caso. Mayoria di e acusacionnan tin di haber cu su mesun famia y probablemente ta relaciona cu su adiccion na droga, aunke e mes ta bisa cu no ta tur ora e ta uza droga y ta un tiki e ta uza. Ta acusa Geerman di a menasa dos persona cu morto y cu kimamento di cas den e periodo 2 pa 16 di maart di aña 2021. Tambe a acus’e cu intencionalmente el a maltrata un persona riba 27 di juni di aña 2022 y riba 22 di october di aña 2022 (su sua) y cu el a destrui un bentana di auto di e swa aki riba 27 di juni di aña 2022; el a lock porta di cushina riba 26 di augustus, 2022; a comete ladronicia di placa dia 27 di juni, 2022; robo di bicicleta y telefon dia 6 di augustus di aña 2022; robo di un celular dia 11 di augustus di aña 2022, mas intento di ladronicia di un wasmashin riba 26 di augustus di aña 2022. Tur esey tabata riba su mesun famia of sua.
E homber aki no ta un desconoci ya cu for di 2010 el a cuminsa haya su mes envolvi cu husticia. Te ey a trata e caso pasobra ta bay pidi e rapport psikiatrico. Ta bay pone Pro Forma riba rol di 24 di augustus y si haya e rapport lo pone un fecha pa su tratamento.
