Diamars a inicia e gran Torneo di Reino na Compleho Deportivo Frans Figaroa. Presenta pa inaugura e Torneo tabata Prins Pieter-Christiaan conhuntamente cu Gobernador di Aruba Sr. Alfonso Boekhoudt, como tambe Minister di Husticia mr. Andin Bikker.
Tur participante a forma parti di un bunita defile. Despues cu Prins y Gobernador di Aruba a schop e prome bala, e Torneo a cuminsa entre Aruba 1 y Hulanda 1.
E wega tabata intenso unda cu Aruba 1 a bataya fuerte contra Hulanda 1. Hulanda 1 henter e wega a lucha pa score nan gol pero ta cay venci 4-0 contra Aruba 1. Stadion tabata tin fanaticonan di diferente pais cu a bin presencia e Torneo di Reino. Tambe ta di admira con cada participante di otro paisnan tur ta anima otro.
Torneo di Reino 2019 ta culminacion di e proyecto di ‘Alleen jij bepaalt wie je bent’, iniciativa di Stichting Laureus. E proyecto ta dedica na hobennnan pa stimula un desaroyo sano pa medio di Deporte.
E weganan ta continua na Compleho Deportivo Frans Figaroa y Compleho Deportivo Nadi Croes y Crismo Angela cuminsando for di 9’or di mainta. Pa mas informacion por like e facebook page di Alleen jij Bepaalt y di Sportszona Aruba.
Diabierna 5 di october, pa 1’or di merdia lo tuma luga e wega final y tambe otorgamento di premionan cu lo tuma luga na Compleho Deportivo Frans Figaroa pa 4’or di atardi.
Stichting Laureus, hunto cu ‘Alleen jij bepaalt wie je bent’ ta haci un invitacion na pueblo di Aruba pa bin presencia e weganan y clausura. Alabes ta pidi apoyo di nos comunidad pa presencia e weganan y hunto brinda un sosten na un manera participativo y demostra solidaridad pa cu desaroyo sano di nos hobennan cu ta futuro di nos pais y tur otro paisnan den Reino Hulandes.
