E conseho di biahe pa Aruba y Boneiro ta bay bira oranje. Esaki prome minister Mark Rutte a informa diamars anochi den un debate di Tweede Kamer unda cu el a papia di e medidanan pa cu corona. Esaki ta nifica cu solamente biahenan necesario lo wordo permiti.
Den e discurso no a sali mucho na cla, pa ki fecha e consehonan di biahe ta bay na vigor.
Te na e momentonan aki e consehonan di biahe pa e dos islanan aki ainda ta para riba geel, loke ta nifica cu por biaha. Pero ta lansa advertencia pa e riesgonan di siguridad.
E medida extra aki di biahe no a bini debi na e situacion rond di corona riba e islanan, pero debi na e “problemanan grandi” na Hulanda, segun Rutte.
“Si e proximo simannan bo dicidi di bay practica deporte di invierno sin ningun tiki berguensa, of bula bay afo unda cu bo no tin nada di busca, e ora bo ta a-social,” Rutte a bisa durante e debate. “No ta pornada a duna un conseho negativo pa biaha.”
Di otro banda, e no ta mira mucho pa bini cu un prohibicion pa bula. “Esey ta posibel, pero e ta un medida increiblemente pisa. E lo tin consecuencia tambe pa transporte di carga. No tin otro cu por haci cu apela riba decencia di cada ciudadano.”