Hulanda: Buscando 5000 hende cu a yega di Africa pa haci test di Covid-19

Autoridad di Hulanda ta tratando di localisa rond di 5000 persona cu a yega den ultimo siman fo’i algun pais di Sur Africa. Esaki ta pa nan haci test di Coronavirus, mientras tabata investiga si un total di 61 persona por a bin cu e variante nobo Omicron despues di a yega ayera fo’i Sur Africa.

Gemeentelijke Gezondheidsdiensten (GGD) ta tratando di localisa e personanan aki cu a yega Amsterdam desde dialuna for di Botswana, Swaziland, Lesotho, Mozambique, Namibia, Zimbabwe of Sur Africa, segun NOS. E obhetivo ta pa laga nan haci test di PCR y determina si nan ta contagia cu Coronavirus y investiga, si acaso test positivo, si nan ta infecta cu e capa nobo.

E 600 pasaheronan cu a yega ayera den dos vuelo di Sur Africa – Johannesburg y Cape Town – a haci e test caba. Di nan 61 ta positivo pa Coronavirus, aunke no ta cla ainda si nan a contagia cu variante Omicron. E dos vuelonan a yega despues cu a anuncia e prohibicion di Sur Africa, loke a laga 600 biahero pega na aeropuerto durante henter dia, ya cu nan tabata warda e resultado. E personanan cu a test positivo mester cumpli un cuarentena obligatorio di por lo menos shete dia si ta presenta sintoma, y di cinco dia si ta asintomatico, mientras resto di pasahero cu a haya resultado negativo tin di isola nan mes pa cinco dia. Nan tin di bolbe haci un test nobo di PCR y si esaki sali negativo, e ora por sali for di cuarentena.

Sesenta hende ta isola den un hotel dje zona di Schiphol, di cual mayoria a test positivo, pero tambe algun a test negativo. Y pa rason logistica of personal a prefera di no isola na nan cas.

GGD tambe a permiti cu cinco persona cu a test positivo tene cuarentena na nan cas, pasobra nan ta biba nan so y por yega nan cas den transporte propio. Diabierna gobierno Hulandes a declara suspension total di tur vuelo cu ta bin dje paisnan di Sur Africa como medida di prevencion despues cu a detecta e variante nobo di Coronavirus den region. E paisnan aki, ademas, “di ta clasifica como area di riesgo hopi halto” di Coronavirus, loke ta supone “un obligacion di cuarententa” y haci dos test na biaheronan dje paisnan aki, y un di nan ta cu e mester ta di menos di 24 ora.

E 27 di Union Europe (UE) tambe a bay di acuerdo diabierna atardi pa suspende e vuelonan di shete pais Africano debi na variante nobo. Segun EFE ta trata di Botswana, Swaziland, Lesotho, Mozambique, Namibia, Zimbabwe y Sur Africa.

• 

•