Durante e siman tras di lomba Gobernador di Aruba, drs. Alfonso Boekhoudt a biaha pa Hulanda unda cu el a haci varios bishita di trabao. E representante di corona Hulandes a probecha pa atende varios asunto, for di cultural te na reunionnan pisa cu Gobierno di Hulanda, relaciona cu ultimo desaroyo den gobernacion local.
Primeramente Gobernador Boekhoudt a bishita Presidente di Hoge Raad der Nederlanden, Dineke de Groot. Topiconan di combersacion tawata entre otro e importancia di legislacion unanime dentro di Reino, formanan di resolucion di disputa, union registra di pareha na Aruba den relacion cu e Convenio Europeo di Derecho Humano y e efectividad di sentencianan minimo.
Gobernador a bishita Raymond Knops, miembro di Tweede Kamer y secretario di estado anterior di Asuntonan Interior y di Reino.
Tambe Gobernador Boekhoudt a reuni cu Minister di Clima y Energia, Rob Jetten. A trata aki di un bishita di introduccion oficial den cua a papia particularmente tocante ehecucion di e paragraf den e acuerdo di coalicion Hulandes cu ta habri e areglonan di garantia di Rijksdienst voor Ondernemend Nederland, di Nationaal Groeifonds y e areglonan pa produccion duradero di energia, pa peticionnan for di e paisnan Caribense tambe.
Na e Palacio Real na Amsterdam riba diahuebs 9 di juni a tuma luga entrega di e premio Zilveren Anjer. Su Mahestad Prinses Beatrix a haci entrega di e premio aki entre otro na e Arubiano Dufi Kock pa su contribucion enorme na preservacion di nos patrimonio cultural cu su conocemento historico di Aruba y coleccion di 1 miyon potret di 1800 te cu awor. Gobernador Boekhoudt a asisti na e ceremonia aki tambe.
Riba diabierna Gobernador a bishita Alexandra van Huffelen, secretario di estado di Asuntonan di Reino, na su ministerio na Den Haag. Aki a sigui papia riba e topiconan cu a toca anteriormente manera reduccion di e descuento di 12,6% riba entrada di funcionarionan publico y e recomendacionnan di College Aruba financieel toezicht encuanto e presupuesto di 2022 di pais Aruba.
E ultimo combersacion oficial durante di e biahe di trabao di Gobernador tawata cu presidente di Kiesraad, Wim Kuijken. Aki a papia entre otro tocante e (im)posibilidadnan di digitalisacion di e proceso di eleccion, e manera cu Hulanda ta reparti restzetels y expansion den futuro di e autorisacionnan di Kiesraad.
Durante estadia di Gobernador Boekhoudt na Hulanda, Gobernador suplente, Agustin Vrolijk tawata encarga cu su tareanan. Desde dialuna 13 di juni Gobernador Boekhoudt ta bek den funcion.
