Riba 14 di juni ultimo, e compania di carga Fast Delivery a firma un acuerdo cu Sarpa Airlines pa transporte di carga. E acto ceremonial a tuma luga na e base principal di Sarpa situa na Medellin, Colombia. Team di 24ora.com tambe tabata presente durante e acto ceremonial aki.
Fast Delivery tin un aña caba ta traha cu Sarpa Airlines pa cu e parti di benta di ticket, tanto na Aruba como na Corsou. Richard Gigi Helder ta propietario di Fast Delivery, durante un entrevista exclusivo cu 24ora.com el a conta cu; awo ta mucho mas facil pa transporte di carga directo pa Medellin y Barranquia y vice versa. Antes esaki tabata posibel pero ta tarda mas, e carga tin cu pasa via otro ciudad den Colombia prome cu yega Medellin of Barranquia.
Richard Gigi Helder ta gradici staff y personal di Fast Delivery pa nan empeño y trabou duro di tur dia pa cu e trabounan di carga. Fast Delivery manera menciona ta encarga cu benta di ticket pa Sarpa Airlines. A cuminsa cu e aerolinea for di inicio. E ruta mas popular actualmente ta Medellin. E vuelo pa Medellin ta bulando “yen yen”, pa cual a añadi un di tercer vuelo semanalmente. Barranquia tambe ta bayendo bon cu su dos vuelo semanalmente. Sarpa Airlines ta trahando duro pa expande e rutanan for di Colombia directo pa Aruba, ta sondeando e posibilidad caba pa e ruta di Cali-Aruba.
E relacion pa cu exportacion y importacion di carga pa Medellin y Barranquia ta cuminsa entrante prome di juli 2022. Tin un demanda pa e rutanan menciona. Ya caba Fast tin su filialnan tanto na Medellin como na Barranquia.
Fast Delivery tin un oficina special pa benta di ticket riba L. G. Smith Boulevard, net pariba di Wendy’s. E no ta un secreto cu tur cos a modernisa y awo por cumpra bo ticket online mes, pero e contacto directo cu un persona a bay perdi, ey ta caminda cu Fast ta enfoca riba dje. Sea pa compra, cambio of cancelacion di un ticket, esey ta posibel cu Fast na su oficina riba Boulevard.
Nathaly Arbelaez ta e gerente comercial di Sarpa Airlines, su mayornan a funda e aerolinea aki. Apenas a cuminsa cu vuelonan comercial, pues ta considera nan mes un compania hoben pero cu historia. E aerolinea tin mas di cuarenta aña di existencia. Tur cos a cuminsa como charter, despues a amplia e compania cu vuelonan di Air Ambulance y awo comercial cu ruta directo pa Aruba for di Medellin y Barranquia. Arbaleaz ta contento cu awo no solamente ta enfoca riba e parti comercial sino tambe e parto di carga, danki na e bon relacion cu Fast Delivery.
Manera Helder a indica, ta sondeando e posibilidad pa amplia mas ruta directo di Colombia pa Aruba. Cali y Bucaramanga ta e dos rutanan ta Sarpa ta enfocando pa realisa pronto, claro directo pa Aruba. Actualmente ningun aerolinea ta bulando directo pa e rutanan menciona, separa di Sarpa cu ta mira e peticion y ta haciendo posibel pa cumpli cu ne. Nathaly Arbelaez ta gradici tur e pasaheronan cu a confia den Sarpa for di nan prome vuelo di 15 di december 2021. Ta invita pueblo henter pa book nan ticket y disfruta di un vuelo confortabel den nan avion Embraer ERJ 145 cu capacidad di 50 pasahero.
