Tur empresa y instituto cu lo cay bou di e ley “Normering Topinkomens” a expresa cu nan no tin duda cu efecto di reduccion di salario lo “trickle down” y baha tur salario. Esaki basa riba e logica cu ora baha di un y e yega mas cerca of bou di esun cu ta cay bou di dje e situacion aki lo mester wordo corigi. E coreccion lo ta pa baha di e sguiente den e structura y asina e efecto lo sigui bay te na e ultimo den e structura salarial, manera nan ta yame e “salarishuis” of e “loonstructuur”. Tur ta bin abou.
Lider di AVP mr. Mike Eman ta bisa cu no ta Raad van Advies y e empresanan y institutonan so ta bisa cu e efecto lo “trickle down”. Den su comentario riba Raad van Advies su ponencia cu e ley aki lo afecta henter e structura di salario e propio Gabinete Wever Croes ta bisa cu e ta verwacht esaki. Gabinete Wever Croes ta contesta Raad van Advies cu e ley mes no lo baha tur salario, pero su efecto si lo causa e reduccion aki.
Mr. Mike Eman ta cita locual Gabinete Wever Croes mes ta bisa: “De normering van de topsalaris binnen de verschillende entiteiten zal mijn inziens uiteindelijk WEL moeten leiden tot een herziening van de totale loonstructuren in die ondernemingen”.
Raad van Advies ta adverti cu e ley aki no ta bon studia. ATA ta teme pa su efectonan riba nan capacidad profesional cu ta asina necesario pa mercadea turismo di Aruba. Banco Central ta bisa cu e ley lo fractura henter e structura di salario di e instituto monetario crucial aki pa stabilidad finaciero-economico di Aruba. Aeropuerto ta adverti pa daño grandi pa henter Aruba. E mesun preocupacionnan aki nos a tende di WEB, Elmar y SETAR, pero Gabinete Wever-Croes ta sigui riba rumbo desastroso aki. Lider di fraccion di AVP, mr. Mike Eman ta bisa cu nan fraccion ta haci nan parti, pero finalmente e doñonan di curpa lo mester tuma postura pa laga Gabinete Wever-Croes y e Coalicion MEP-RAIZ sa kico nan posicion final ta. Unabes cu e ley pasa e bala lo cuminsa lora na desbentaha di tur empleadonan, mr. Mike Eman ta teme.
