E dossier cu ministerio publico a entrega na corte den e caso di tiramento banda di misa di Noord ta deficiente. Suficiente motibo pa no por a trata e caso profundamente diabierna ultimo. A dicidi pa mand’e pa hues comisario cu algun instruccion.
Mester bisa cu pa e caso aki cu ta relaciona tiramento entre miembronan di gang, y cu no tabata problema biaha cu tin violencia, a pone vigilancia estricto.
Tin tres acusado y tabatin seis miembro di CEA (Cuerpo Especial Arubano) mientras cu den otro areanan di corte tabatin funcionarionan di unidad special bon arma. E siguridad aki tabata valido den corte pero tambe pa transporte di e presonan for y pa KIA bek.
Ta trata di e homber Edwin Carrasquilla Arrieta (25 aña) y e dos hobennan Even Ortega (19 aña y menciona den pasado den otro caso di tiramento) y Darnell Hernandez (19 aña).
E acusacion contra e trio aki ta cu riba 5 di februari ultimo, nan tabata envolvi den un tiramento banda di misa Santa Anna na Noord, te cu un di e autonan a bay dal den cura di misa. E acusacion tambe ta papia di intento di mata y esun alcansa tabata esun di fam Martina. Ta papia di hunto of cu otro.
Ademas di esey, ta acusa nan tambe di posesion di arma di candela.
Ta e parti ey so a bini dilanti tambe, pasobra e magistrado a cuminsa pa expresa su preocupacion pa algun omision of deficiencia cu el a constata den e dossier. Pa cual a dicidi di pospone e caso te pa otro aña, pendiente mas investigacion.
Pa un relato amplio lesa TREMPAN.
