Secretado di estado demisionario na Hulanda, Alexandra van Huffelen ta bisa cu tin dos discusion cu Aruba cual tabata cana pareu. Hulanda a laga sa cu entrante prome di januari 2024 e protocol pa supervision financiero lo tabata tin mester un proposicion nobo pa un LAft. A traha riba e proposicion y tabata tin algun punto di discusion y na e momento ey van Huffelen no tabata na Hulanda pero prome minister di Aruba a reuni cu Rijksministeraad unda a dialoga riba varios punto.
“A logra yega na e LAft entre ambos entidad, e ta acorda pero esaki mester yega Staten di Aruba cual ta e siguiente paso.” E segundo discusion tabata tocante e Rijkswet. Hulanda tabata riba e punto cu nan a haci palabracion dos aña pasa caba pa bin cu un supervision financiero, un Rijkswet. Esaki ta algo cu lo crea un sistema cu Aruba no por cambia e normanan di e presupuesto. E Rijkswet ainda no tin un acuerdo riba esaki, ainda tin discusion riba esaki y tanten e ta nifica cu Aruba lo paga un interes mas halto riba prestamo di Corona, te ora cu implementa e Rijkswet.
Sinembargo, van Huffelen a splica, na momento cu parlamento di Aruba aproba e Landsverordening (LAft) e momento ey ta bin un rebaho den pago di interes, un porcentahe manera cu tin actualmente na Corsou.
Aki no ta trata di un protocol pero mas bien un LAft nobo segun van Huffelen. “Pa e porcentahe di interes mas abao cu por ehempel awo Sint Maarten tin den cuadro di prestamo di Covid, ta esencial pa bin cu un Rijkswet. Tanten no tin esaki nos por biba cu un LAft y confiansa cu lo bini un Rijkswet.” E trahamento di un Rijkswet manera esaki, van Huffelen ta admiti, ta tuma su tempo. Lo bay tanten na e porcentahe di 5.1%, awor e ta 6.9% pa Aruba, pero esun mas abao di 3.4% Aruba lo haya ora cu completa e asunto di Rijkswet anto implementa esaki debidamente.
“Lo ta bon kisas pa menciona atrobe cu e motibo dicon nos ta haci’e asina ta pasobra nos kier cu e pago di e prestamo aki y refinanciamento bay riba a base di bon acuerdo.” Pa por solamente tin un LAft ta haci esaki facil pa Aruba ta ‘eenzijdig’ pa cambia esaki cual Hulanda no ta haya na su luga.
Van Huffelen ta enfatisa cu en principio e palabracionnan haci ta palabracionnan entre dos partido, dus Hulanda cu Aruba, mescos Hulanda cu Corsou tin nan palabracion, y Hulanda cu Sint Maarten. Esaki tambe ta conta pa acuerdo administrativo, van Huffelen ta enfatisa cu palabracionnan haci cu e islanan no ta bari for di mesa djis paso lo tin un gobernacion nobo na Hulanda. Lo por ta e caso si cu e gobierno nobo lo por bay over na haci palabracionnan nobo.
“Di esaki ami no por naturalmente bisa hopi,” van Huffelen ta expresa. “Pero mi ta spera durante proximo tempo – mirando cu formacion di gobierno tambe ta dura un poco – cu e islanan y Reino den su totalidad por mira desaroyonan bunita atrobe.”
