Un bruhamento tin den un caso den cual Ministerio Publico a dagvaard un miembro di Cuerpo di Duana. A acusa e funcionario di a horta un celular. Pero e investigacion no tabata completo pa cual hues a ordena fiscal haci algun investigacion adicional.
Ministerio Publico a cita Carol Hodge y a acus’e di a horta un celular, cu tabata forma parti di carga di un compania cu a yega Aruba. Esaki a sosode den e periodo di 17 di februari y 17 di maart di 2021. Pues practicamente dos aña pasa y te awo e caso a bini dilanti. Y e no a caba ainda, pasobra hues a pospone e caso di forma indefini pa fiscal haci investigacion adicional.
E celular aki ta forma parti di un cargamento di Lucky Stores cu a bini for di exterior. Den e citacion di OM ta para cu e handset aki a perde durante cu a procesa e carga aki na entrada. Den e seccion ey un hende a bay cu ne.
Hues a cuminsa pa repasa e dossier y haci pregunta na e acusado, kende ta nenga di a pasa pa e celular marca Samsung. Si e ta admiti di tabata e funcionario cu a controla e cargamento aki ora cu el a yega Aruba.
Despues cu e doño a ripara cu falta un, y a haci denuncia, recherchenan a cuminsa cu nan investigacion. A bin saca afo cu e acusado tabatin e celular aki den luna di juni y a uz’e dos dia durante juni, 2021. A saca afo cu e uza e aparato cu un number di Digicel, cu ta di e acusado.
Hodge ta bisa cu el a cumpra e chip aki via di “vraag en aanbod” y a bay Digicel pa registr’e riba su nomber. E tabata kier a uz’e pa ora cu e biaha pa Corsou, unda su pareha ta biba. E compra aki el a haci na juli y a uz’e un biaha so. Y esaki e ta sigura, no a sosode den e periodo menciona den e procesverbaal. “E tempo ey mi no tabatin e chip.”
Pero e rapport di recherchenan ta bisa algo diferente. Nan ta bisa cu for di juni, 2021 e chip ta riba nomber di e acusado aki.
Den Corte hues a haci diferente pregunta. Principalmente con bin el a bay controla e carga. El a haya e factura di Lucky Store den su computer. A corda cu hopi biaha tin problema cu lote di e celular di e compania aki.
Segun el a declara, tabatin tres caha. Y berdad el a descubri discrepancia. Prome el a compara e mercancia cu loke tin poni riba e factura. Den un caha tabatin un celular Samsung mientras cu riba e factura ta poni dos. A haci e cambio den e factura tambe.
Pero Lucky Store a entrega keho pasobra ta sinti falta di un celular. Y tabatin e serial number. A base di esey a cuminsa investiga. A constata cu a uz’e na Aruba cu un number di Digicel. Pa autoridadnan ta demasiado casualidad cu e acusado aki cu a klaar in e mercancia tabata esun cu tin e number riba su nomber.
Miembro di Cuerpo di Duana tin un rol importante y di confiansa. Pa horta un celular ta atacha nomber di e cuerpo aki pa cual el a exigi 80 ora di trabou pa comunidad of 40 dia cera. Banda di esaki, a pidi un luna cera condicionalmente, y dos aña di prueba.
Pa mas detaye lesa TREMPAN.
