Pronto Stichting Rancho lo cuminsa cu ehecucion di un proyecto nobo. Ta bay cuminsa na midi e calidad di aire den Oranjestad. Esaki ta loke cu presidente di e fundacion Clifford Rosa a duna di conoce.
E fundacion a logra asocia nan mes cu Metabolic Foundation pa realisa e proyecto. Nan a logra pone un air sensor den un mashin cu e fundacion tin, pa midi e calidad di aire. Lo registra informacion 24 ora pa dia 7 dia pa siman
Ta trata di cinco punto cu e sensor lo midi di e aire di Aruba. Esaki ta importante, segun Clifford Rosa, pa crea data riba e medio ambiente. Por corda cu den pasado a pone un aparato na e pier di piscadonan na waf di Rancho. Mirando cu a modernisa e sensornan, lo bay haci test un biaha mas na e waf tambe. Esaki ta importante pasobra lo haya dato di e awa di lama tambe, su temporatura, e calidad (sushi of limpi). Pero tambe lo haya si e aire di Aruba ta contamina.
Den proyectonan cu e fundacion kier haci, mester dispone di bon data y data confiabel. E aparato ta instala caba den e parti ariba di e sede di Stichting Rancho.
Danki na e asociacion cu Metabolic Foundation, e sensornan aki no a costa Fundacion Rancho ningun placa. Nan mes a diseña e aparatonan pa crea data di medio ambiente.
E fundacion di Rancho tin un proyecto cu yama Waste Management Rancho Oranjestad pa cual e data aki lo ta importante. Investigacion ta parti di e proyecto pa maneho di desperdicio den Oranjestad.
