Manera cu nos a anuncia tres siman pasa, awe mainta corte a anuncia su decision den e caso penal contra e hefe di e seccion di “Bedrijfsvoering” na Cuerpo di Bombero, esta Orlando Eduardo Arends, miho conoci como Ditto. Fiscal a pidi castigo den forma di un boet pasobra e no por a proba e acusacionnan contra Arends y awe hues a conden’e y a bay di acuerdo cu e castigo proponi door di fiscal.
Durante tratamento di e caso penal, por a conclui cu e decision tuma pa suspend’e tabata un persecucion politico. Mas ainda si despues di dos aña, e mesun fiscal di Ministerio Publico ta pidi pa declar’e liber di desfalco di dos laptop y cu a haya proba solamente destruccion.
E caso aki tabata data di october 2020 y januari 2021 ora cu supuestamente, segun e acusacion, el a comete desfalco di dos laptop cu ta pertenece na Cuerpo di Bombero. Un tabata nobo y e otro tabata un bieu cu supuestamente no tabata traha mas.
Ministerio Publico finalmente no a haya cu por proba desfalco pero si destruccion y a pidi un castigo di 400 florin of 8 dia cera, kitando e tempo cu el a pasa den detencion preventivo. Kitando e dianan cu a cer’e inhusto, a baha e multa cu 150 florin, pero e lo mester paga solamente Afl. 250 pa un investigacion cu a tuma añanan largo, sin produci e castigo desea.
