E Palabra di Dios no ta un entretenimento, no ta algo pa haci wega of bofon di dje. E ta poder di Dios pa esun cu ta kere y tambe liberacion pa tur esunnan cu ta mara den gara di scuridad.
Mundo completo ta pasando bao di un nubia scur di desobediencia, den tur sentido, tanto den famia, social y spiritual.
Ta parce manera hende a perde cabes y perde caminda di Dios, maldad ta wordo aproba, mientras cu bondad ta wordo rechasa, pero Dios keto bay kier papia cu esun cu kier tende. Awe nos ta trece pa bo, locual ta consecuencia di desobediencia pa, abo y bo famia por ta na altura.
Desobediencia na Dios ta trece lo siguiente den bo hogar:
Confusion: (1 Corintionan 14:33) Pasobra Dios no ta un Dios di confusion sino di pas.
Conflicto: (Efesionan 4:31) Laga tur amargura, furia, rabia, gritamento, wordo kita for di boso, hunto cu tur malisia (maldad, pensamento malo).
Causa dolor:( 2 Corintionan 13:5) Samina boso mes pa wak si boso ta den e fe. Of boso no ta reconoce di boso mes cu Hesus Cristo ta den boso.
Falta di pordon: (Proverbionan 28:14) Bendiciona ta e hende cu semper tin temor, ma esunnan cu ta haci curason duro lo cay den calamidad. Laga nos pordona otro mescos cu Dios a pordona nos, pasobra si nos no pordona otro Dios tampoco ta pordona nos.
Depresion: (Proverbionan 12;25) Ansha den curason di hende ta hacie abati, ma un bon palabra ta hacie contento.
Disciplina: (Job 5:17) Bendiciona ta e homber cu Señor ta reprende, p’esey no desprecia e disciplina di e Todopoderoso. Disciplina semper ta hiba nos na crecemento, Dios ta disciplina esun cu e ta stima.
Kico ta pasa ora un pais wordo guia, apoya of pusha den inmoralidad y desobediencia na Dios.
Desobediencia ta trece castigo di Dios (Levitico 26:14, Jeremias 30:1-24);
Desobediencia ta trece huicio di Dios (1 Cronicas 21:14+15);
Desobediencia ta lanta rabia y furia di Dios (Romanos 1:18-32, Salmo 7:10-16);
Desobediencia ta hiba hende fierno (Proverbionan 11:21, Mateo 13:41+42);
Desobediencia ta stroba bendicion (Deuteronomio 28:15);
Desobediencia ta rebaha hende (1 Samuel 16:1);
Desobediencia ta trece morto (Santiago 1:14-15);
Desobediencia ta trece malesa (2 Cronicanan 21:14+15);
Desobediencia ta pone Señor cera cielo (Deuteronomio 11:16+17);
Desobediencia no ta laga hende drenta e tera priminti. ( Numbernan 20:8-12).
Porta un hende ta pensa na unda mi ta saca tanto tempo pa lesa tanto cos asina, pero laga nos ta serio miho nos lesa awe y obedece cu nos yora mañan cu Dios kier, pasobra rond mundo nos ta mira con palabra di Dios ta cumpli, pasobra cielo y tera lo pasa , pero e palabra di Dios lo permanece pa semper.
Ta para skirbi den Galationan 1:9: Manera nos a bisa caba, asina mi ta bolbe bisa awor: Si cualkier hende predica na boso un evangelio contrario, na esun cu boso a ricibi, cu e sea maldiciona.
Ta tempo pa bisa, predica, papia, canta e palabra manera e ta, pasobra si nos no bisa hende e berdad, hopi lo keda decepciona y hopi lo bay perdi, pasobra esey ta e plan di e enemigo, pa mantene hende den scuridad y desobediencia.
Pero riba tur esaki e palabra di Dios ta siña nos cu hende no tin mester di keda biba den pica, pasobra si nos confesa nos pica Dios ta fiel y husto di pordona nos, nos picanan y libra nos di tur inhusticia (1 Juan 1:9). Esun cu sconde su pica lo no prospera, ma esun cu confesa y laga nan lo haya misericordia (Proverbionan 28:13).
