Den oranan di merdia un cantidad di vehiculo policial a ser mira bayendo direccion di Lighthouse. Tur esaki relaciona cu meldingnan cu a drenta cu tin personanan ilegal scondi aya tras.
Tabatin no menos cu seis auto di polis mas brommer cu a mobilisa rapidamente pa e sitio, ya cu e meldingnan cu a drenta diamars merdia tabata cu a mira seis persona sospechoso, probablemente ilegal, moviendo den area di Lighthouse.
Ya caba den oranan di madruga un boto a baha un grupo di ilegal y a gara tres persona, mientras personal di Guardacosta abordo di nan nave a confisca un boto cu e capitan y su ayudante pa contrabanda di persona.
Polisnan cu a bay patras di Lighthouse a haci un buskeda intensivo, haciendo uzo inclusive di helicopter pero no a topa cu ningun persona sospechoso. Probablemente lo sigui atento pa cualkier movecion straño, ya cu ta duda cu un boto ta trece solamente tres persona, esnan aresta.
E controlnan na costa nort di Aruba lo sigui.