Un rato pasa, durante un reunion yama cu trahadonan di Camara di Comercio y Industria, a anuncia cu e Director di e organisacion, Sofia (Sonja) Velthuizen, a tuma su retiro. E noticia a cay manera un sorpresa cerca empleadonan, cu a custuma cune caba pa e ultimo añanan. Motibo di e retiro ta personal, segun e mes a confirma na nos despues di e reunion.
Di acuerdo cu Velthuizen, ta for di algun tempo caba e tabata cana cu e idea pa join su casa den negoshi. E ta kere cu awor ta un bon momento pa e regresa den sector priva. Sonia Velthuizen normal den su contract tin 3 luna di anticipacion ora di retiro, pero el a acorda cu Directiva pa duna nan 9 luna y como tal, lo traha na KVK te cu dia 31 di december 2019. Di e forma aki, Velthuizen ta duna suficiente tempo pa e Directiva actual por busca un remplasante y pa e percura pa un traspaso corecto.
Sonja Velthuizen ta trahando na Camara di Comercio desde aña 2011. Sinembargo, ora cu Leo Maduro a tuma retiro na aña 2015, el a asumi e funcion di Director interino pa mas o menos un aña. Desde aña 2016 e ta den e funcion di Director di Camara di Comercio y Industria di nos pais. Pues despues di apenas 3 aña, awor e ta sinti cu ta basta y ta cla pa un reto nobo den sector priva hunto cu su casa.
