No falta hopi pa celebra dia di Pasco y hopi hende ta den Caya Grandi pa haci nan compra di Pasco. Tambe por a mira e caranan contento cu awo un biaha mas auto por pasa den Caya Grandi y cu esaki ta yen.
Ligia Barrido ta haya Caya Grandi bunita y ta gradici cu e Caya Grandi ta habri un biaha mas, y cu tur hende por haci compra bek. E idea di gobierno habri Caya Grandi ta uno bon, el a indica. Esaki ta pa motibo cu Caya tin hopi hende ya cu antes e tabata su so.
Pa loke ta preparacion el a indica cu tur cos ta bayendo bon. E tabata haciendo compra di regalo pa tanto su casa como su amistadnan.
Prasser ta pasahero di crucero y ta di Alemania. Pa diescuater dia e ta riba barco crucero, unda e ta pasa tanto Pasco como Aña nobo, unda ta pasa bishita algun isla den Caribe. E ta haya e experencia aki uno fabuloso, pasobra cada dia nan ta bishita un isla. Esaki ta prome biaha cu Prasser a bishita Aruba y ta haya e isla fabuloso. E ta haya ta un lastima di no mira tur cos, pero tin posibilidad di bin bek. Di ta riba crucero e ta haya esaki un bon oportunidad pa mira un pais y asina ey por tuma decision si ta regresa.
Un persona cu tabata haciendo su compras di Pasco a expresa cu e habrimento di Caya Grandi pa tur auto pasa ta algo sublime. Esey ta pone cu Caya Grandi a haya bida bek. E ta cla pa Pasco y tabata haciendo e ultimo compranan.
Mariska a indica cu e preparacionnan pa Pasco ta bayendo y ta hopi preparacion. E idea cu a habri Caya Grandi pa auto pasa ta uno bon, pasobra e tabatin hopi tempo cera. Tambe ta duna e oportunidad pa mira un biaha mas Caya Grandi bibo. Ta cana berdad den Caya Grandi, pero no tin e ambiente manera antes ora cu auto tabata pasa.
