E parada di Parada di Flambeu a bay den un ambiente total. El a cuminsa exactamente 8:05pm na Dakota y e ultimo grupo a yega 2:01am na ex edificio di DOW. Mayoria participante a laga sa di e goza hopi durante e prome parada di Carnaval 65, cu generalmente ta esun mas grandi tambe, debi na participacion masal di publico. Tabatin un total di 15 mil participante parti den 12 grupo.
E organisacion di Parada di Flambeu 2019 tabata den man di SMAC, kende hunto cu Cuerpo Policial y otro departamentonan di Gobierno a percura pa e parada sali na ora, caba na ora y sin mayor incidente durante e parada.
Di e gruponan participante, Pink for Life di Le Groove a resulta esun mas grandi den participacion, cu riba 2 mil hende den un massa grandi, mayoria amante fiel di e musica soca. Nan tabata e ultimo grupo di e parada. Como cu e aña aki no tabatin un Last Lap Band, hopi participante di otro grupo y publico den banda a bosha na final tras di Le Groove. Esey sigur no tabata e idea.
