Apenas dos luna pasa Aruba a cera conoci cu e videoclip di Honeypot titula “You don’t have to go away”. Esaki tabata un cantica dedica na salud mental y esaki dibiaha a subi den e listanan di top cantica pa 2022. Aworaki atrobe e banda ta logra lansa un videoclip pa e pueblo di Aruba por gosa di e musica tan gusta di e agrupacion musical.
Chayo Tromp, cantante y fundado di Honeypot, a conta cu varios di nan proyectonan a stanca debi na e pandemia di Coronavirus, pero cu disminucion di caso y flexibilisacion dje medidanan a pone cu nan por a cuminsa toca bek, genera entrada p’asina nan por sigui cu e proyectonan den tapara. E biaha aki Honeypot a bin cu un cantica cu ta bolbe bek n’e reis di reggae titula “Straight Out the Caribbean”.
A bin cu e titulo aki debi cu reggae a nace den Caribe y ta p’esey Honeypot semper a pusha pa e genero aki na Aruba y den e region. Fuera di esey, Tromp a conta cu tin hopi turista fanatico cu semper ta keda bishita nos isla y ta pidi pa reggae, pues debi na e demanda a bolbe bin cu esaki. Cu e videoclip nan a opta pa haci uzo di varios area banda di beach p’asina promove Aruba.
“Aruba ta nos pilar di economia y nos tin nos beachnan bunita, nos tin nos eventonan bunita y e clip ‘ki nos a focus ful band’i lama of hera den lama mes.” Tromp a gradici henter e ekipo tras di e produccion di e videoclip y ta invita un y tur pa wak e videoclip riba YouTube di Honeypot Caribbean y share e pa hunto nos promove Aruba.
