Awe den oranan di atardi por a mira aglomeracion di auto di polis y ambulance den Klipstraat net patras di caya grandi na Playa.
No ta conoci kende a bati alarma, pero ora cu autoridadnan a yega na e sitio rond di 5:00 PM , a haya indicacion cu mester subi bay na e di dos piso di un edificio den e area ey.
Por a compronde cu personal di ambulance mesora a cuminsa cu intento pa reanima e homber. No por a haya ningun informacion concreto eybou, pero algun adicto ambulante a duna di conoce cu lo ta trata di un turista. E edificio mes no ta den uzo na e momentonan aki.
Ta parce cu el a bay haci uzo di un substancia desconoci y inmediatamente despues el a bay for di tino. Esey ta e informacion no oficial cu a ricibi na prome instante.
Un testigo a conta cu un persona a core baha cu tin un homber birando malo eyriba. E no sa kende a bati alarma, pero e sa cu e homber mes a grita pidi pa yama ambulance. El a expresa esaki tanto na Spaño como na Ingles y e tabata hala rosea hopi fuerte. A puntr’e si e por lanta, el a bisa cu e no tin forsa y no por hala rosea.
Segun e testigo, nan a bis’e cu el a consumi cocaina y alcohol for di trempan cu e tabata eynan. Na momento cu e personal paramedico a subi ta parce cu e homber a fayece caba. A trata di yud’e pero sin resultado.
Kende e ta no ta conoci ainda.