Diadomingo den careda di 3:40am polis a mobilisa na altura di misa Santa Ana na Noord caminda un persona ta full na sanger pidiendo ayudo. Na yegada di polis ya e persona a subi den un pick up Isuzu color shinishi nrA-66385 pa bay direccion hospital.
Mesora un persona a para pa bisa polis cu e persona full na sanger a caba di subi e pick-up cu a caba di pasa e patruya. E agente nan policial a bay tras di e auto y par’e. Segun e victima a bisa el a cay cu brommer. Pero e situacion ta poco straño y mesora a cuminsa un investigacion caminda a ser pidi BFTO y recherche na sitio, unda cu tabata tin basta sanger benta riba caminda.
Un testigo a tuma contacto cu nos mesa di redaccion y a conta cu tin un persona ta pidi ayudo na Noord na altura di Imeldahof y cu e unico cos cu e por a haci pa e persona ta kita e faha di e guy mare na su man pasobra e persona tin un corta profundo na su man y a bis’e e ta yama ambulance y e persona a core bay spanta, lagando su tas atras.
E testigo a bisa cu el a coy e tas y pone banda di e stacion di bus. Funcionarionan di BFTO a tuma esaki den beslag.
