Normalmente ora cu un hende cumpli aña, e persona ta haya regalo y ta disfruta tur cu tin su dia. Pero esey no a pasa cu e persona aki.
Diahuebs, mey ora prome e dia a bolter tabatin un grupo di persona na un minimarket na Madiki ta bebe.
Den tur esey un di e amigonan a coba mama di un juffrouw, cual naturalmente no tabata nada di agrado p’e. A cuminsa cu un discusion entre e dos personanan aki, cu a culmina den agresion. E dama a duna e homber un bati bati den tur manera posibel.
E homber a purba di subi su auto pa bay, pero e juffrouw a alcansa pa kibra su windshield. Fuera di esey el a tira un boter di cerbes den direccion di e homber prome cu esaki a bandona e sitio.
Den e proceso e homber a yama polis y a bolbe bek ora cu polis a yega. Eynan e agentenan a tuma nota cu e homber tabata bebi y riba dje na stuur. A dun’e dos opcion: sea cu ta regla cuenta e ora ey cu e dama of ambos ta bay cera. Partidonan a opta pa drecha cuenta entre nan.
Mirando cu e homber tabata bebi, polis a conclui cu e homber no por stuur. A bis’e cu lo hib’e cera toch. Ora cu a check su rijbewijs, a tuma nota cu e persona lo ta haciendo aña manera cu dia bolter. A base di esaki, pa haci su dia un tiki menos pisa, polis a bay cu su auto te na su cas pa asina e homber, compaña pa su sua, yega sano y salvo, evitando asina pa pone bida di otro na peliger.
