“Mientras cu Minpres ta atendiendo reunion den exterior, su vice-prome ministro ta cu vakantie sin cu a cuminsa traha mes ainda siendo recien apunta como minister y su colega Minister di Economia aparentemente tampoco ta na Aruba”, esey ta e prome reaccion di e lider di fraccion di MAS den Parlamento awe despues cu a sali na cla cu Hulanda ta tuma medida y ta para fiansa pa Aruba debi na falta di cumplimento. Ta parce cu akibanda no ta tuma gobernacion na serio y consecuentemente Hulanda a cera e cranchi mesora riba e gobierno nobo.
“Lo ta na su luga pa awo cu boso ta minister, pa informa Staten di boso ausencia y no por medio di vacation pics por ehempel via facebook. Anto esaki ta e prome siman di gobernacion”, segun Marisol Lopez-Tromp, cu ta e parlamentario cu mas experiencia den parlamento y como minister, sinta actualmente den parlamento.
Segun Prome Minister, Hulanda a para placa pa Aruba p’e lunanan di october te cu december 2021, pasobra gobierno lo no a corta e suma di 60 miyon den cuido di salud manera cu Gobierno mes a acorda cu Hulanda. Pero e parlamentario a cuestiona cu “E proceso di formacion y 115 reunion cu stakeholders a dura casi 3 luna y segun Gobierno nan no tabatin mandato pa por a actua…pero si a tuma hopi otro decision siendo demisionario”.
Marisol Lopez-Tromp ta denuncia cu a taha tur e politiconan envolvi cu e siguiente periodo di gobernacion lo no ta un “walk in the park” sino di tuma medidanan pisa debi na mal maneho y falta di cumplimento di e mesun Gabinete Wever-Croes I aki. No ta di awo Hulanda ta pidi pa baha gasto, pero gobierno deliberadamente a sigui tuma mas hende na trabou, a forsa pa tin 8 minister, no a baha gasto y for di formacion ta “den fiesta”, awo hasta te na New York. Ta spera cu awo cu Hulanda a para e fiansa pa Aruba, cu e realidad di kico ta spera Gabinete Wever-Croes ta riba mesa. “A pone un gobierno pa traha, basta cu fiesta, celebracion y biahamento asina”.
