Por bisa cu siman y ainda luna a habri den un tono positivo pa personal di Holiday Inn. Dialuna mainta gerencia di e hotel y sindicato FTA a firma un Acuerdo di Contracto Colectivo (CAO) cu lo ta vigente desde awo y pa e proximo tres aña. Den dje a logra diferente beneficio pa e trahadonan, segun FTA a indica y ta inclui aumento di salario. E firma di e acuerdo a tuma luga den Da Vince Ballroom di e hotel na Palm Beach.
Simone Farci, gerente general di Holiday Inn, a inicia e conferencia di prensa indicando cu nan ta hopi contento cu a yega na un acuerdo hopi bon despues di un negociacion largo den cual tabatin hopi punto pa discuti; un acuerdo pa sigui traha hunto den e añanan cu ta bin. El a admiti cu no semper esaki tabata facil mirando cu ta ainda saliendo for di un pandemia. Un reto en particular tabata e prome trimester di 2022 cu a keda afecta pa e variante di Omicron y consecuentemente e resultado di high season. Asina mes, gerencia ta wak nan dilanti na un bon temporada di zomer y pa proximo aña un high season mas fuerte.
Miembro di directiva di Federacion di Trahado di Aruba (FTA), mr. Hose Figaroa a admiti cu tabatin momento cu cos a pega entre e partidonan, pero a sali afo exitoso y tur hende a keda contento. Manera ta custumber, a bay bek na miembronan pa presenta e oferta y e ultimo version a haya casi n 100% di aprobacion; pues un acuerdo cu un sosten hopi amplio. Figaroa, den nomber di FTA a gradici e delegacion negociado di Holiday Inn consistiendo di e gerente general y tambe e gerente di recurso humano. El a remarca cu FTA ta hopi orguyoso di por continua cu e bon relacion cu e hotel aki cu ta data di, nada menos, cu 50 aña largo.
Di su banda, presidente di FTA, Rudy Geerman a pasa riba algun di e detayenan di e CAO cu, manera a menciona, ta valido pa un periodo di tres aña durante cual ta bay reparti un aumento di 8% riba salario pa tur miembro di e sindicato. Finalmente a yega na un acuerdo cu hotel cu e managernan no ta inclui mas den e reparticion di e 15% di service charge.
Esaki lo cay directamente bou responsabilidad di e hotel y e placa adicional aki ta reparti solamente entre e trahadonan y no miembro di gerencia. A bin cu un sistema caminda esunnan cu mas aña di servicio, ta bin na remarca pa un indice mas halto di aumento di nan salario.
Fuera di tur e puntonan menciona, pa Geerman ta hopi importante cu e CAO nobo aki ta brinda e trahado un sinti di stabilidad y siguridad laboral. Door di firma e acuerdo, e hotel ta manifesta su confiansa den e economia y nan producto y e siguridad ey ta pasa over pa e trahado tambe.
