Awe cu ta exactamente seis luna prome cu 4 di october, Dia di Bestia, tin toch un bunita storia di un cacho pa comparti. E ta un storia di conscientisa nos comunidad riba trato di bestia y tambe di con trahando hunto, ta logra resultadonan impresionante. Tres luna despues di a haya Tyson, e cacho casi morto, el a recupera totalmente y ta mustra hopi saludabel y bunita, danki na e esfuersonan haci pa Luna Foundation y Animal Health Vet Clinic.
A topa Tyson na e clinica veterinario ubica na Punta Brabo, cerca di hospital, caminda e tabata hunto cu Zoey Conijn di Luna Foundation di bishita. Awendia Tyson no ta ni e sombra di loke e tabata bek na december 2021 ora cu a bin haya mara na un cas na Brazil, demasiado flaco y su curpa tur na sarna. Conijn a comenta cu hopi biaha ta hustamente e cachonan cu tin doño ta esunnan den pio condicion. Esaki ta paso diferente, na e cacho di caya, esun aki ta mara y no por busca manera pa yuda su mes sobrevivi. Dus e ta mara tambe na e maltrato y abuso.
24ora.com tabata hunto cu Luna Foundation e dia ey na Brazil. Ainda e doño a bisa nan: “No worry pa bay cu esey, esey ta bay muri toch; bay cu e otronan”. No a haci caso y a bay cu Tyson. Cu hopi cuido, amor, bon cuminda y tratamento medico, a transforma e cacho aki den uno masha bunita, saludabel y cu ta lief cu otro hende y bestia. E tin un dushi color chuculati.
Awo ta buscando un doño p’e y no ta lag’e bay cu ken cu ta. Esun interesa mester cumpli cu un screening y un di e rekisitonan di mas importante pa tin un cura di cas. Di e manera aki ta sigura cu no ta bay mara e cacho di nobo. Conijn a bisa cu nan no ta yuda bestia pa despues hende bay mara e bestia atrobe.
Tyson ta otro storia exitoso di e trabou cu Luna Foundation Aruba Inc. ta haci. Y bo tambe por yuda. Nan tin mester di boluntario pa yuda cu e cuido y mantencion. Tambe por yuda door di aporta cuminda. Actualmente tin 100 cacho bou di nan cuido y nan mester come dos biaha pa dia. Tambe ta expandiendo cu nursery pa puppies y ta desea di crea un espacio apart pa e cachonan cu ta mas bieu, manera un bejaardentehuis. Si bo ta desea di yuda, por yama of whatsapp directamente cu Zoey Conijn na 563-6567.
Tambe ta recorda cu por yama nan si ta wak cacho den bario riba caya, pero tambe si ta wak cu tin un bisiña cu tin un cacho den mal estado of ta maltrata esaki. Hopi hende ta pensa cu sarna no ta curi, pero esey ta berdad y Tyson ta prueba di esey. No tuma un cacho si bo no tin e amor of e tempo pa atende cune. Un cacho ta un responsabilidad pa bida y no ta djis cuestion di awa y cuminda, tambe tin mester di su hangua, di su pildo pa purga y atencion medico. “Si bo no por haci esey, no tum’e”, Conijn ta enfatisa.
