Gemeenschappelijk Hof van Justitie a dicidi cu hues mr. E. Diepraam por sigui trata e caso penal contra Chania Chante Fernandes-Pedra. Den su decision di dia 6 di november 2026, e “wrakingskamer” di Corte encarga cu peticionnan di wraking a declara parti di su peticion inadmisibel y a rechasa e resto como infunda. E caso penal lo sigui for di e punto na unda a suspend’e.
E peticion pa reemplasa e hues a drenta dia 4 di november, durante e audiencia den cual Hues Diepraam a dicidi pa cuminsa trata e contenido di e caso, aunke Fernandes-Pedra a presenta sin abogado. Dos dia despues, e sospechoso a comparece cu abogado mr. J.J.C. Odor na e caso di wraking. Diepraam a entrega su reaccion por escrito. E wrakingskamer a anuncia su decision verbalmente e mesun dia y a sigui cu un motivacion por escrito.
A suspende e caso penal durante e audiencia
Segun e decision, autoridadnan a detene Fernandes-Pedra dia 5 di januari 2026. Na momento cu Corte a dicidi riba e peticion di wraking, ainda e tabata den detencion preventivo. Ministerio Publico ta acus’e di, entre otro, doodslag — causa morto intencionalmente — y dood door schuld, causa morto door di bo culpa, como acusacion alternativo. E otro acusacionnan ta inclui intento di doodslag of di maltrato grave, sigui core despues di un accidente, stuur bou influencia di alcohol y maneha un auto sin un rijbewijs valido.
Corte di Prome Instancia a atende e caso dia 10 di april, 3 di juli, 20 di augustus y 2 di october. Segun e decision, Fernandes-Pedra tabata sin abogado den e caso desde 25 di juni. Hues Diepraam a tuma e caso na su cargo for di e audiencia di dia 3 di juli.
Na e audiencia di dia 4 di november, Hues Diepraam a repasa e esfuersonan haci pa busca asistencia legal pa Fernandes-Pedra. Despues di scucha e sospechoso, fiscal y representante di e partidonan perhudica, el a dicidi pa sigui cu tratamento di e contenido di e caso. Segun e hues, varios intento pa haya un abogado a resulta sin exito. El a bisa cu Fernandes-Pedra y su famia no kier a paga un abogado mas y cu e sospechoso a nenga abogadonan pro deo sin motibo valido, segun su evaluacion.
Hues Diepraam a señala cu esaki ya tabata e di cinco tratamento di e caso y cu no tabatin perspectiva di haya un abogado alternativa. El a considera tambe interes di e victima- y partidonan perhudica y di comunidad den yega na un conclusion di e proceso. Ora e peticion di wraking a drenta na griffie penal rond di 3:37 pm, e hues a suspende e caso mesora. E decision ta menciona 18 di november como e fecha programa pa continua awor cu e caso.
Fernandes-Pedra a cuestiona con Corte a maneha su defensa
Fernandes-Pedra a argumenta cu e no a ricibi e dossier penal completo y cu, sin abogado, e no por a prepara su defensa debidamente. El a cuestiona tambe con e hues a trata su peticionnan pa investigacion y pa lanta of suspende su detencion preventivo. Segun e sospechoso, e maneho di e peticionnan y di su asistencia legal, mira hunto, a duna motibo pa duda di e imparcialidad di e hues.
Durante e tratamento di e wraking, Fernandes-Pedra a bisa cu e tabatin motibonan concreto pa no acepta e ultimo abogado proponi. Segun su relato, el a ofrece un USB cu grabacionnan di audio pa sostene su obhecion, pero cu Hues Diepraam no a scucha e grabacionnan pasobra no por a conecta e USB na e sistema di computer di Corte. Fernandes-Pedra a argumenta cu e hues por a busca un otro manera pa ricibi of scucha e material. El a cuestiona tambe si sigui cu e caso bou e circunstancianan ey tabata compatibel cu su derecho riba un proceso husto.
E sospechoso a pidi ademas pa investiga si e manera cu Corte ta asigna casonan di Edwardo Alexandro Mathew, su padrino, por a influencia e tratamento di su propio caso. Den su reaccion por escrito, Hues Diepraam a indica cu Mathew no ta parti den e caso penal, cu e no conoc’e y cu nunca el a trata un caso di dje!
Corte a considera parti di e peticion demasiado laat
E wrakingskamer a conclui cu e investigacionnan solicita, incluyendo esun relaciona cu Mathew, tabata cay pafa di su competencia. En cuanto e motibonan presenta den e peticion original, cu tabata fecha 2 di november y entrega dia 4 di november, nan a establece cu Fernandes-Pedra tabata conoce e circunstancianan ey basta tempo prome cu tratamento di e caso. Segun e huesnan di wrakingskamer, no a sali na cla circunstancia excepcional cu a impedie di entrega e peticion mas trempan.
E huesnan cu a trata e protesta di e sospechoso a laga e motibonan adicional presenta dia 6 di november pafo di su evaluacion. Segun su interpretacion di ley, un persona mester presenta tur motibo pa wraking na mes momento. Hecho nobo cu e persona a conoce despues di entrega e peticion por wordo tuma na cuenta. Wrakingskamer a conclui cu no a presenta hecho of circunstancia nobo cu ta cumpli cu e condicion ey.
Hues Diepraam por sigui trata e caso
Pa evalua e decision di Hues Diepraam pa sigui cu e caso di dia 4 di november, wrakingskamer a referi na hurisprudencia di Hoge Raad. Den un procedimento di wraking, e pregunta ta si un decision procesal, mira den contexto di henter e caso, ta tan incomprendibel cu parcialidad di e hues ta e unico splicacion rasonabel. Tumando na cuenta e desaroyo di e casonan anterior, e wrakingskamer a conclui cu e decision di Hues Diepraam no a yega na e nivel ey.
Hues Diepraam a sugeri cu e peticion tabata un forma di logra otro aplaso y a pidi e wrakingskamer pa considera laga un siguiente peticion sin tratamento. Pero nan a determina cu no tabatin base pa califica e peticion como abuso di derecho. Cu e decision di dia 6 di november, e tratamento di e acusacionnan penal por sigui for di unda a keda suspende. E decision riba wraking ta resolve ken por sigui trata e caso. E acusacionnan contra Fernandes-Pedra ainda ta pendiente di un sentencia.
Tocante un wrakingsverzoek
Un wrakingsverzoek ta un peticion formal pa reemplasa e hues cu ta trata un caso. E persona cu ta haci e peticion mester señala hecho of circunstancia concreto cu ta duna motibo obhetivo pa duda di e imparcialidad di e hues. Por ehempel, un relacion personal entre e hues y un di e partidonan por duna motibo pa analisa si e hues por sigui cu e caso. Si e hues mes pidi pa retira su mes di e caso, esey ta yama verschoning.
Wraking di un hues no ta comun
Wraking ta un recurso legal reconoci, pero na Aruba e ta poco uza. Segun e reportenan anual di Gemeenschappelijk Hof van Justitie, na Aruba a drenta shete peticion na aña 2024 y un solo peticion na 2025. E cifranan di Hof ta conta peticionnan entrega. Hof ta señala cu na 2024 algun peticion a bin di e mesun persona. Hof a declara e unico peticion di Aruba na aña 2025 como inadmisibel. Pa aña 2026, te cu dia 16 di november, por confirma por lo menos un solo peticion na Aruba, esta esun di Chania Chante Fernandes-Pedra. El a entreg’e dia 4 di november y e wrakingskamer a dicidi riba dje dia 6 di november.
Wraking den Reino Hulandes
Na Corsou a drenta cinco peticion na aña 2024 y 9 na aña 2025. Na Sint Maarten a drenta tres peticion na aña 2024 y sigui pa un solo peticion aña pasa. Na aña 2024 no tabatin ningun peticion pero aña pasa si a drenta dos. Tanto na Saba como na Sint Eustatius no tabatin ningun peticion ni dos aña pasa ni tampoco aña pasa. Den caso di Hulanda si e storia ta diferente, pasobra na aña 2024 a drenta 704 peticion y aña pasa no menos di 714 peticion pa wraking. Na Hulanda, di e 714 peticionnan na aña 2025, e reportahe anual ta registra ocho concedi, rond di 1,1%.