Un caso basta serio a tuma luga den e parkinglot di Paseo Herencia na Noord ora cu un hoben a cay for di e segundo of tercer piso di e establecimento. Den un situacion basta serio, a pidi presencia di ambulance cu maximo urgencia na sitio.
Te na e momento aki no por haya un informacion oficial di kico por a tuma luga. Testigo a duna di conoce cu a scucha un sonido fuerte y a bin topa cu e hoben tira riba suela. No tabata na tino pero si tabata halando rosea. Tambe a compronde cu e hoben, di apenas binti aña cu identificacion local, tin un lesion hopi grandi na cabes. Tin di bisa cu no por saca afo kico a tuma luga pero e hoben su situacion ta uno hopi serio.
Polis a bin encontra algun pertenencia personal, kibra y tira na vloer, di e hoben aki na e segundo piso, tambe a haya informacion cu e vehiculo di e hoben tambe ta riba e dicho piso y pesey a cera e area ey tambe. Na yegada di ambulance a traha basta rato riba dje mirando cu su situacion ta critico. A sali rumbo hospital despues di un rato.