Ya ta mas di un siman caba cu a tuma luga e sorteo di Lotto 5 den cual e premio tabata no menos cu 2 miyon florin. Nos a informa den forma di primicia dia 9 di october cu e premio a cay na Sabana Basora, pero awe despues di un siman completo, ningun ganado a presenta pa reclama e premio ni tampoco a yama pa bisa cu lo bin.
Nada nobo
“Casi tur ora ta asina. Nan ta cuminsa yama puntra cos prome y despues ta bisa cu nan a gana y te despues ta haci afspraak pa bin cobra. Pero ainda ningun di eseynan a sosode”, asina Ronald van den Berg, director di Canadian Bank Note Aruba, e operado di Lotto di Aruba, a informa nos awe.
Tin dia ainda
Pa esunnan cu kisas ta tur ansha pasobra un siman a pasa, por ta trankil. “E ganado tin tres luna, o sea nobenta dia, pa reclama su premio”, asina Ronald van den Berg a aclaria. E no ta corda ningun biaha cu un premio a yega di keda aden, pues cu ningun ganado a cobr’e. E ta corda cu a yega di tarda hopi si prome cu a pasa cobr’e, pero na final e ganado a presenta.
Y si e ganado no presenta nunca?
“E ora nos mester rif’e di nobo”. Den e reglanan di Lotto di Aruba un premio no por keda aden. Imagina cu e doño a perde su ticket of a lab’e den wasmashin of a bent’e afo, ta di warda nobenta dia y bolbe saca un premio di 2 miyon florin como e jackpot. E chens cu esey lo sosode ta minimo, pasobra tur biaha e ganado a presenta despues di tempo. Pero si e sosode, e regla ta cu mester rifa e premio di nobo.
Sin ticket no tin premio
Ta bon pa subraya cu e unico forma pa cobra cualkier premio na Lotto di Aruba, ta door di presenta cu un ticket ganado cu e barcode cu ta identifica cu esey ta e ticket ganado. No tin otro sistema, manera testigo pa confirma cu abo a cumpr’e, pero bo a perde e ticket, of si a lab’e den wasmashin, cacho a come pa malasuerte of a bent’e den bar’i sushi sin sa cu e tabata contene e premio ganado.
Ta cu number premio a gana Lotto
Contrario na e hecho cu, mayoria biaha e ganado a cumpra Lotto Loco, e biaha aki e ganado a cumpra numbernan propio. Probablemente ta su fecha di nacemento, adres di cas of cualkier number cu ta relata na un fecha importante di e ganado. Den casonan asina, hopi bes e bendedo di loteria tambe sa conoce su cumpradonan of sa nan numbernan “vast”. Den pasado, hopi biaha, ta e bendedonan ta yama e cumpradonan pa bisa nan pa check nan ticket pasobra probablemente nan a gana e Lotto. Pero e biaha aki ni e bendedo ni e cumprado no a presenta asina pa avisa cu nan a gana, pues ta reina un silencio hermetico riba e premio grandi aki.
A dura seis aña
Despues di seis aña, e premio grandi di Lotto 5 a alcansa e bunita suma di dos miyon florin (Afl. 2.000.000,=). Un solo cumprado a gana e bunita premio aki. El a cumpra e ticket ganado na Manton Lottery na Sabana Basora.
E numbernan ganado di Lotto 5 tabata: 20-30-05-23 y 19. Joker: 01 – Letter: G. E prome premio tabata di Afl. 2.000.000,00.
E prome y ultimo biaha cu e wega di Lotto 5 a alcansa un premio di 2 miyon florin tabata seis aña pasa, esta na aña 2015. E record di Fundacion Lotto pa Deporte tabata un sorteo di Mini Mega Plus di algun aña pasa cu a yega di alcansa 3.7 miyon florin.
Pa Lotto di Aruba, nan ta masha gradici na pueblo di Aruba cu semper a sostene e fundacion. Nan sa cu e placa ta bay bek den deporte y cu e compania tras di e loteria ta solido y cumplido. No tin nada mas importante pa sa cu e organisado di e loteria por paga bo ora bo gana. E confiansa ey ta biba bou di tur cumprado di Lotto di Aruba. Nan ta consciente cu, por ehempel, e ganado di awe nochi por yega dialuna trankil cu su ticket ganado y cobra su premio di dos miyon florin sin ningun problema.
