Diabierna anochi, despues cu polis a bay atende cu un caso di auto laga atras den cura di un cas na Dakota, polisnan a bay controla den e area pa cualkier movecion straño cu por tabata relaciona cu e vehiculo laga atras.
Mientras nan tabata para den e area a tuma nota di un auto saliendo for di cura di un cas den Pindastraat, a laga esaki sali riba caminda y a dune ordo pa para. E hoben chauffeur a pensa cu lo tabata un bon idea di habri porta y sali na careda. E hoben a drenta mondi y polis su tras.
No a yega mucho leu. Den e mondi dilanti e cas mes, a pon’e na suela y deten’e. Su acto sospechoso mes a hiba na su bishita na warda pa e anochi aki, pa asina duna cuenta di e motibo di su acto.
Mientras cu tur esaki tabata tuma luga, e mama di e cabayero aki, a haya ta bon di manda algun palabra menasante den direccion di colega di 24ora haciendo su trabou. Mesora polis a hala su atencion y mustr’e riba e seriedad di cualkier menasa cu e lo por a pensa di expresa.
