Diabierna anochi polis tabatin man yen cu un grupo grandi di persona cu a bay offroad panort di nos isla. Ta for di atardi caba polis tabata ocupa cu e grupo aki na altura di sporthall na Santa Cruz. Pa ora solo a baha alrededor di 7:00pm a cuminsa atende cu e grupo na altura di Bushiribana. Tur hende a split ora polis a yega. Tabatin asina hopi auto cu a pidi refuerso di polisnan di Noord, Playa, Strand Politie, Motor Unit y tambe RRT.
Di un manera hopi tactico, a cuminsa pusha e grupo pa bay direccion Alto Vista. Ey a despacha varios unidad di polis tambe. Na Boroncana tambe tabatin hopi polis mirando cu e grupo di auto kier a purba huy sin cu polis para nan.
A parti multa y kita varios vehiculo. Na Bushiribana a kita dos Suzuki Samuray, un quadracer y brommer. Na Alto Vista na altura di Kapel y tambe na Boroncana tabata mesun tiro. Varios persona a keda na pia mirando cu nan auto no tabatin tur e documentonan necesario pa ta riba caretera.
Tin cu aplaudi e forma tactico con polis a atende cu henter e situacion aki. For di laira e helicopter di polis tabata ilumina y guia e agentenan na tera.
Polis tabata hopi activo mirando cu tabatin aglomeracion y bebemento manera nada ta pasando mientras cu Aruba a lanta cu diescinco caso nobo di Coronavirus awe.
