Kende den su infancia no a bay campa na SKA. Verkennernan durante curso di hopi aña a sa di bay haci nan excursionnan eynan y pasa nan anochi den tent. E biaha aki, tin un cambio nobo y un cambio pa miho. SKA awo ta cay bao di encargo di Stichting Faciliteiten Scouting Aruba (SFSA).
John Hessen, presidente di SFSA, a splica cu ultimamente nan ta e fundacion di e Vereging Scouting Aruba, cu a yega na un convenio cu SKA pa maneha e luga di campamento como nan centro di Scout y tambe centro di campamento. Naturalmente un luga cu tin tanto aña, tabatin mester di un renobacion y restauracion. Esey a logra pa medio di ayudo di hopi instancia cu awo nan por a tene un softopening. Meta principal tabata pa gradici e instancianan ey pa e aporte cu nan a duna, e sosten financiero cu a duna y tambe pa mustra nan na unda e placa a bay.
Ta hopi importante ora cu haya subsidio, pa hendenan por mira na unda a uz’e. E ta un deber cu tin. Prome minister tabata presente, pasobra gobierno a cubri un parti di e renobacion. Tabatin instancianan manera FCCA, Cede Aruba, Black Tie Foundation y tambe voluntarionan cu a sali for di nan propio seno, sea tata di lidernan of muchanan, cu a yuda cu instalacion di coriente, instalacion di tuberia, drechamento di veld, pa medio di un bakhoe y por sigui menciona.
Tambe Gobierno di Hulanda, via VNO, a yuda cu e inventario di cushina y su instalacion. Tambe a conta riba e sosten di semper di ATHA, cu tradicionalmente ta yuda cu programa di actividadnan ora cu haci esaki pa hobennan. Tur e instancianan cu a invita, cu a yuda pa subsidia e proyecto aki, tabata presente pa por a gradici nan y mustra nan na unda e placa di e subsidio di nan a bay.
Hasta a conta cu Boy Scouts of America, cu tin nan fundacion cu a aporta cu un suma basta considerabel pa por a drecha e sala grandi. Tur esaki a yuda cu awe tin e compleho actual.
Ta invita tur organisacion cu kier haci uzo di e luga pa tuma contacto cu nan via nan pagina di Facebook y tambe por book pa cualkier actividad. E ta hopi uza no solamente pa instancianan di afo, pero tambe pa actividadnan priva.
