Ainda fresco den memoria e caso di Kawaiah cu tabatin un practica como dentista cu a resulta di ta ilegal, awo e mesun persona cu a saca e detayenan ey na luz publico, ta trece informacion tocante tecniconan dental cu no ta capacita pa haci trabou den boca di pashent. Drs. Hendrik Marsman a invita varios medio na su oficina dialuna mainta pa splica kico ta pasando y con ta afecta e cuido dental na Aruba.
E biaha aki, segun Marsman, ta trata di un Arubiano mes, esta Igor Croes. Na 2018 Croes a haya autorisacion di parti di director di DVG, Jerry Staring y cu instruccion di Minister di Salud Publico, Dangui Oduber pa viseer, a cuminsa funciona como denturist. Pero e practica ey ta contra ley pasobra e no tin e estudio indica pa por traha independientemente den boca di pashent.
Fuera di esey ta traha plancha mas caro cu dentista, sacando te has dos biaha e placa di pashent cu no sa miho. Tambe Marsman a indica cu ta uza un material cu no ta bon y cu por haci daño na e weso di boca y carni di djente. Normalmente ta un dentista tin cu manda e pashent na e tecnico y tambe aproba su trabou prome cu e pashent por cuminsa us’e. Y ta bon pa e pashent sa cu AZV ta cubri gran parti di e gastonan aki, caminda pa un plancha completo, e pashent mes ta paga 200 florin y pa un parcial, 100 florin.
“Ami mes no tin ningun interes den e caso aki, pasobra mi no ta traha cu AZV,” Marsman a bisa. Sinembargo e ta bin dilanti cu e keho pasobra e ta kere cu ta un inhusticia na Aruba cu e cos aki ta pasa, “cu vooral e hendenan grandi cu ta cobra onderstand y tin tiki entrada. Nan no ta bon informa.”
Pa e relato completo, lesa TREMPAN
