Josephine Albertus, presidente di sindicato SIMAR a opina cu “tin espacio pa baha gasto”. E ta referi na e cantidad di coordinadornan cu Minister-president Evelyn Wever-Croes tin na su disposicion. SIMAR a investiga cuanto coordinador tur minister-president tin den henter Reino Hulandes y ta resulta cu Aruba ta lidera e lista.
SIMAR a anuncia cu pais Aruba tin un populacion di 112.839 ciudadano, segun rapport di CBS di dia 31 di maart 2022. A conta cu Gabinete Wever-Croes II, specificamente Prome Minister Evelyn Wever-Croes tin 21 trahado den su bureau. Ora compar’e cu Hulanda, cu tin un populacion di 17.735.617 ciudadano, segun rapport di CBS di dia 14 di augustus 2022. Ey Minister-president Rutte tin 17 trahado den su bureau.
Contrario na Aruba, na Hulanda e funcion di e 17 trahadona ta 1 Secretaris Generaal, 1 Plv. Secretaris Generaal, 10 Raad Adviseurs, 1 Secretaris van de Ministerraad, 1 Adjunct Secretaris, 1 Beveiligings adviseur, 1 Adviseur Protocol Buitenland y 1 politieke assistent.
Na Corsou, un pais cu un populacion di 151.066 ciudadano, segun rapport di CBS di dia 1 di januari 2022. Ey Minister President Pisas tin 7 trahado den su bureau. Na Sint Maarten, cu un populacion di 42.577 segun rapport di dia 1 di januari 2021. Ey Minister President Jacobs tin 5 trahado den su bureau.
“Y ainda un hala di hende tin miedo di lanta para pa nan derecho”, asina Josephine Albertus a enfatisa.
Di otro banda, Prome Minister no a aprecia e comentario di e sindicato di maestronan y a reacciona mesora: “Josephine Albertus, ora di compara, compara ‘appel’ cu ‘appel’. Di e 21 personanan na mi ministerie, 7 ta adviseurs. E demas ta administratief personeel, secretaresse, huishoudelijk personeel, bode, chauffeur y beveiliging. Eseynan den caso di por ehempel Premier Rutte ta cay apart di su conseheronan cu bo a menciona. Pues si kier compara cu Hulanda of Corsou, mester compara cu e 7 adviseurs na mi ministerie. Hulanda 7, Curacao 7, Aruba 7. Ademas, mester tene cuenta cu por ehempel premier Rutte no tin carteranan manera Infrastructuur, Overheidsorganisatie, Innovatie manera ami si tin y cu mi mester di adviseurs riba e terenonan ey. Esaki ta djis pa aclarea. Mi ta contento cu sindicato SIMAR a bira critico, algo cu mi a haya falta di dje di 2009-2017, tempo cu ex-premier Mike Eman a yega te na 400 persona riba su payroll. Sigui ta critico y semper informa bo mes bon prome.”
