Dialuna atardi un biaha mas dump tabata na candela. Parti patras di e sero, cerca di lama tabatin vlamnan grandi ta bay halto. Huma preto tabata penetra den nos lama. Un biaha mas ta sigui kima taira di forma clandestino riba dump. E habitantenan di Parkietenbos no por mas cu e situacion aki. Aunke cu tabata parti paseit, toch e huma ta bay abou y pasa via bentana y penetra den sofa, paña y tur caminda den cas. Recien nan a ricibi un noticia positivo, Minister di Naturalesa, Ursell Arends a anuncia cu desde 22 di augustus 2022, dump no lo acepta taira mas.
E mandatario a indica recientemente cu; e resultado di e forum di Trash 2 Cash a identifica dos compania cu por procesa taira den forma efectivo actualmente, cual ta Ecotech y Carentra. Desde 22 di augustus 2022, tur desperdicio di taira lo mester wordo deposita na un di e dos localidad nan aki.
“Mi ta di opinion cu cooperacion ta un acto esencial pa logra un Aruba cu un maneho di desperdicio responsabel, pa nos bida marino, pa e salud di nos hendenan, y unda respet, solidaridad y accion conhunto ta presente den tur etapa di e proceso pa asina logra e meta aki”, minister Arends ta subraya.
“Ningun compania di desperdicio lo ser exclui, ni awo ni den futuro. No por permiti faboritismo ni tampoco ningun monopolio den e maneho di desperdicio”.
