“Caya ta papia” cu na momentonan aki si bo tin griep, na cierto dokter di cas bo no ta permiti pa drenta facilidad pa atende bo fisicamente, algo cu a supuestamente cuminsa sosode despues di e pandemia.
Den un entrevista cu Dokter di cas y president di Asociacion di Dokternan di Cas (HAVA), Dr. Joaquin van Trigt, e ta bisa cu e palabracionnan cu HAVA (Asociacion di Dokternan di Cas) su coleganan tin no ta encera ningun reglanan over di pashentnan cu griep, of riba e variante nobo di Covid19, cu no ta wak pashentnan den praktijk. Dr. Van Trigt ta desmenti esaki, bisando cu ‘nos sa e pandemia di Covid ta nos tras danki Dios. Aworakinan manera tur aña tin episodionan di griep, y no tin ningun palabracion cu bo no por wordo mira of bo no por drenta praktijk.’
Locual si ta conseha na pashentnan ta cu ora bo bin bo dokter di cas y bo tin sintomanan respiratorio, pa bo tog bisti bo tapaboca. “Presenta bo sintomanan si pa nos por sa y tene cuent cu ne. Tin biaha por ta un tiki dificil ora bo yega den un camber yen di pashent cu ta tosa libremente, por ta tin biaha por haya tiki discusion, pero no ta asina cu nos no ta wak pashent fisicamente cu sintomanan di griep.”
E dokter ta bisa cu despues di e pandemia, a bay bek na maneranan di wak pashent normal. Semper HAVA ta keda den contacto cu DVG (Directie Volksgezondheid) pa wak si tin algun cambio, pa wak e canalnan of rednan social di noticia pa wak si tin algo nobo, pero te ainda no tin ningun motibo pa tin panico riba algo nobo andando pa nos tin panico di dje, segun DR. Van Trigt.
