Diasabra ultimo, esta dia 2 di september, e candeloso torneo di biyar bola 8 pa esunnan 60-plus titula “Jani Brokke Memorial Tournament” a sigui den ful swing aya n’e palacio di biyar na Tanki Leendert. E torneo anual aki, organisa pa Fundacion Movemento ta Bida, a habri porta di santana y pone algun di e astronan di siglo pasa wandro bin mesa pa demostra cu ainda nan taco ta stret!
E anochi a cuminsa sensacional ora dos “sluwe vossen”, Ernesto Pardo y Lucky Viviano, a dal den otro y cuminsa un baile macabro di skeinmento, pasa otro 6 p’un 9, “clistéétjes” strategico y leu a leu un “raspaito” di suerte! Publico kiermen cu nan sa cu ta un best out of three nan a wak, pero nan a sinti manera cu t’un best out of 37 nan a experiencia! Na final, e diosnan di biyar a dicidi di duna fabor na “age before beauty” y Lucky Viviano a elimina su mes!
Moonchi Kelly a demostra di tabata “van het goede hout” y a bula Ruudje Arends afo. Franklin “Frenzo” Ruiz a manda Koffie cas; Ernesto a sigui contra su “Nemesis”, Omar Lampe, kende un biaha mas a resulta di ta condena pa Pardo. Moonchi a sigui manera un trein y a duna Juni “kilowatt” Figaroa un “kortsluiting”! Coriente a hera bay na Tanki Leendert! Na otro mesa, Sheik Orman a pone Franklin “Frenzo” Ruiz come su barba sin salo ni peper.
Diasabra awor, 9 di september, cuminsando pa 6:00 pm ne’ palacio di biyar na Tanki Leendert, gran final ta sigui cu Kwek Chirino contra Legendario Buchi Briezen; Juni Quant contra Sheik Orman den rond di perdedo, y e gran semifinal di Patrick Henriquez contra Gino Geerman! Entrada ta completamente gratis pa pueblo en general bin goza.
