Awe mainta e Asociacion di Dokternan di Cas (HAVA), hunto cu e Asociacion di Specialistanan, representando sector di cuido, ATIA, Camara di Comercio, Aruba Food & Beverage Association y tambe AHATA, representando e sector priva, na oficina di ATIA, caminda cu a expresa nan preocupacion riba e situacion den e sectornan. Segun presidente di HAVA, dr. Joaquin van Trigt, ta compronde cu tin situacion di crisis cu Aruba ta aden. E sector medico no tabata prepara pa un crisis asina pisa y a haya nan mes confronta cu hopi reto cu ta yegando su punto maximo.
Resumiendo, HAVA a manda un carta dialuna anochi pa Gobierno di Aruba, pa Parlamento tambe y pa AZV, indicando cu nan ta hopi preocupa cu e situacion den e sector. Hulanda a pidi pa bezuinig 5 miyon riba e budget mensual di AZV cu ya caba a pone cu e sector di cuido mester a entrega for di juli, 11% riba nan entradanan. A negosha cu AZV, a yega cierto acuerdo cu por a rebah’e un tiki, pero te ainda e situacion financiero di e instancianan medico ta hopi dificil.
HAVA ta representa e prome liña, esta cuido di dokternan di cas, tambe e fisioterapeutanan, verloskundigennan, dentistanan, boticanan. Tur ta wordo confronta cu situacionnan cu awor aki, na e momentonan aki cu un exta korting na augustus, cu a wordo implementa di un banda so, cu 25% riba un korting di solidaridad cu a acepta. Esaki ta nifica cu awor aki hopi dunado di cuido den prome liña, como dokter di cas, no por cumpli cu nan costonan mas. Por ehempel, den e praktijk, mester ta disponibel pa coy telefon, pa duna e servicio cu na e momento cu yama, ta haya un hende cu ta atende.
Door cu no por paga salarionan mas, no por paga hipoteca. Dado momento e servicio ey ta bay sufri cu mester por ehempel kita personal for di trabao y esey tambe ta afecta e calidad di cuido. A papia riba remedinan cu no por wordo paga. Hopi hende hopi biaha ta kere cu ta bay riba placa. No ta asina preocupa riba placa pa e dunadonan di trabao, cual tambe ta importante. Pero si ta preocupa pa e calidad di cuido cu ta bay afecta e pashent. Na e momento cu no por acudi mas na e prome punto di atencion, cual ta e dokter di cas, e persona di confiansa cu por duna e prome base di cuido medico, tur hende ta bay sinti esey. Ora bay botica y ripara cu no por haya e remedinan mas pasobra e botica no tin e placa pa paga e importadornan, ta bay sintie directamente. Ta preocupa pa e calidad di cuido y tambe e peliger cu e pashent ta bay enfrenta, ta birando dia pa dia mas serio.
Dr. van Trigt a elabora ademas di esey ta haya cu e cuido na Aruba no ta hayando e atencion cu e merece, ya cu ta parce cu e prioridad en realidad ta mas den e sector publico unda si ta dicidi pa paga e salarionan completo, kitando afo e corte di solidaridad. Pero si ta wordo paga completo, pero ora ta bin na cuido medico, e sector di cuido mes, ta e ultimo den rij si resta placa, pa por haya algo. Esey ta un desaroyo cu ta hopi peligroso y na e momento aki HAVA ta sinti cu si no bin un solucion y un sosten financiero agudo, cu ta sostenibel, cuido lo bay cay den otro y tur ta bay sinti e efectonan, no solamente pa awo, pero pa e añanan cu ta bin. Por ta hasta cu calamidadnan cu no por para responsabel pe, pasobra ta purba di duna e miho cuido posibel, pero si e sosten no bin, esta material, personal, mester cay afo, e dokternan no por garantisa e calidad di cuido mas. Esey ta bay afecta e pashent, esey ta bay afecta nos comunidad y lo bay sinti’e hopi pisa cu hasta porta ta bay tin perdida di bida cu no por ta responsabel pe. HAVA ta hopi preocupa pa e desaroyo aki.
