Josephine Albertus di SIMAR y Jose Dirksz di SPA a firma un carta manda pa Minister Presidente mr. Evelyn Wever-Croes relaciona cu no dunamento di informacion riba e situacion di e posicion huridico di e empleadonan publico, e fondonan cu no tin pa paga salario e luna aki y kico ta e otro medidanan cu e Gobierno aki tin pensa di ehecuta contra empleadonan publico. Ta scuchando varios rumor pero di e prome mandatario mes no ta scuchando nada y pio ta hayando contesta riba nan cartanan.
Ambos sindicato, considera dos di e grandinan den gobierno, kier haya un update di Gobierno riba con ta bayendo cu e negosacionnan entre Gobierno di Aruba y Gobierno di Hulanda. Mientras cu for di e canal oficial ta reina un silencio total, riba rednan social por lesa asina hopi cos. Esaki ta haci e miembro di e sindicatonan preocupa riba kico lo ta nan futuro.
Ya caba polis y docentenan a entrega como 12,6% di nan entrada como aporte na Covid-19, pero ta scuchando constantemente cu lo bin mas medida y cu kisas hasta mester baha e cantidad di empleadonan publico den servicio sea directo of indirecto cu Gobierno. Ta pesey e miembronan kier sa te na unda e medidanancu Gabinete Wever-Croes tin cla den tapara, lo afecta e posicion huridico di e empleado publico.
Ta den e cuadro aki awo SIMAR y SPA ta boga pa bin claridad urgente y pa nan por splica nan miembronan riba kico ta pasando y kico nan lo por spera den e simannan nos dilanti. Nan ta prefera ta bon prepara, en bes di haya e tipo di noticianan asina den forma di sorpresa.
Loading…
Reload document 
Open in new tab 
