Varios doño di restaurant ta super frustra cu e maneho di gobierno. Un maneho cu ta mustra cu ta tira tur culpa di aumento di casonan di COVID-19 den scochi di HORECA. Ta limita restaurantnan den nan operacion, cu cantidad di hende y orario, pero si ta permiti pa e hendenan fiesta na cas. Un maneho cu Patrick Wemmenhoven, propietario di Gusto Nigh Club Aruba y Lobby Restaurant, no ta compronde.
E empresario recientemente a haya COVID-19 y ainda ta recuperando di e consecuencianan di e virus aki. Hustamente pa e motibo ey e y su team ta consciente di tur medida di precaucion cu mester tuma. “Mi ta super frustra cu tur loke ta pasa riba e isla aki. Asina cu e casonan cuminsa subi, Horeca ta haya e culpa. Awo nos tur sa pakico e casonan ta subi. Prome minister personalmente a bisa cu Horecta ta cera Pasco y Aña Nobo pa 10’or di anochi, y bo por bay sinta na cas den grupo di 30 hende. Gobierno a obliga e hendenan pa bay fiesta na cas.”
Su negoshinan ta mantene un protocol cu mester laba man, bisti mondkapje y ta tuma bo temperatura y mester mantene nan mes na e reglanan. Pero cu e maneho, e ta mira, e hendenan ta wordo manda cas, pa sinta hunto braza y sunchi otro. “P’esey e casonan a subi y ta culpa nos atrobe. Restaurantnan so mester cera pa 10’or di anochi. Hotelnan por haci loke cu nan kier. No ta controla cantidad di hendenan, ora di cierre ni distancia social. Tur cos ta posibel den e hotelnan,” e empresario cu tabata mustra hopi rabia a splica.
Su problema ta cu hotelnan, cu no ta paga casi nada belasting na Aruba, ta beneficia y restaurantnan ta wordo trapa door di e gobierno. “Mi ta fada di e gobierno aki con e ta trata nos,” Wemmenhoven a comenta.
Ta facil si un persona kier organisa un fiesta, ta simplemente reserve un camber den hotel. “Nunca mi a mira un gobierno na henter mundo, y esaki ta bin di mi boca y mi curason, cu tin un rabia asina grandi riba su mesun pueblo. Loke mi no ta compronde ta cu ningun hende ta bisa nada. Ami como Hulandes ta para aki conta mi version. Aki na Aruba no por bisa nada, pasobra gobierno ta bay personalmente tras di e persona. P’esey niun hende tin curashi pa bisa algo. Negoshinan ta kibrando. Aña pasa 700 compania a bay failliet door di maneho di e gobierno. Nos tur ta kibrando.”
El a conta cu e tin 2 negoshi cu 60 personal y aña pasa el a haya 3.5 miyon menos na entrada. E no por caba di compronde e motibo pakico mester cera pa 10’or di anochi. Riba prome di januari nan tabatin 200 reservacion, e dia mas druk di aña y riba e dia ey mester a cera pa 10’or di anochi. “Cinco pa dies e Polisnan ta para ey’fo ta literalmente grita nos pa cera. Hendenan mester a hinca nan cuminda den doggy-bags pa bay.”
Na Hulanda, el a conta, a haci studio y a saca cu unicamente 2.6% di e casonan ta bini for di Horeca. Na un pais unda cu no ta obliga pa uza mondkapjes. “Tambe a papia cu den restaurant por tin maximo 4 persona, mientras cu gobierno mes ta bisa cu e contagionan ta tuma luga na cas, unda ta permiti bishita di te 25 persona.
“Asina nos no por traha. Si boso kier pa nos cera nos portanan, bisa nos y mañan mi ta cera negoshi y tur cos a caba.”
