Stichting Ja Ik Aruba ta ofrece un programa/curso cu ta completamente gratis unda nan ta yuda coach bo pa bo siña liderazgo, profesionalismo y etica di trabao, pa asina bo sa con pa prepara bo mes pa haya un trabao. Den e curso aki bo ta haya diferente tipo di charla y tambe encuentro of bishita na diferente compania y empresanan rond Aruba pa asina e hoben siña conoce etica di trabao for di un punto di bista hopi mas cerca y detaya.
Tabata apenas un luna pasa cu Jalken Antonia di Stichting Ja Ik Aruba a sinta cu un trahado di Directie Onderwijs cu a bis’e cu e cifranan di esnan cu no ta caba nan scol, riba cada nivel, ta hopi halto. Sigur ora bo ta yegando riba e parti di EPI, bayendo HBO y Universidad, e ta bira mas halto.
Den esaki e fundacion ta haya informacion y durante aña ta parce cu esaki tikitiki ta birando mas segun Antonia. “Nos hobennan tin nan retonan personal.”
Na momentonan aki tin ocho spot habri ainda pa e curso In The Picture, ‘Career Matching Program’ cu ta yuda e hoben reconoce y desaroya su talentonan y conocemento den loke ta etica di trabao.
E programa ta pa hoben adulto entre 18 cu 28 aña cu no a logra caba nan scol y cu no tin trabao, pa nan participa pa yuda nan haya un trabao, siña abilidadnan nobo anto con nan por ta exitoso y logra nan metanan na pia di trabao. Por yama riba 699-2242 of via Facebook por manda mensahe riba Stichting Ja Ik Aruba. Ta haci falta ocho hende mas pa cera e grupo p’e siguiente ronda aki.
“Nos ta hiba nan n’e doño di trabao, na HR, y bo ta haya sa kico ta e ambiente, kico e trabao ta rekeri, si bo ta gust’e si of no. Asina bo por bishita diferente compania y haya sa cua bo ta gusta mas y cua no,” segun Antonia.
Tin dos cos bo por haci: bo ta participa, of bo no ta participa. Pasobra e curso ta gratis, y unico cos cu e fundacion ta pidi ta pa bo ta serio den esaki ora bo registra. E pregunta mester bira kico lo por ta e costo si bo no participa, y no siña cierto cosnan cu bo no tabata sa kisas bo mester pa logra bo metanan, enbes di si bo ta bay p’e of no.
Antonia ta informa cu den e prome rondanan caba algun di e participantenan a haya trabao caba y por mira con esaki ta habri nan mente pa loke ta hopi di e realidadnan di bida y etica di trabao.
“Asina cu bo kier un trabao, y hopi biaha no sa dicon no ta haya un trabao, den esaki bo ta haya e sabiduria y bo por experiencia kico ta e cosnan cu un dunado di trabao ta puntra. Dus bo por siña on the spot y bo ta haya mesora e informacion riba kico ta importante pa bo por haya e trabao.”
