En principio pa loke ta campamento mes, e grupo di famia y amistad cu ta yama nan mes Freezone Gang Camping tin mas cu 20 pa 30 aña ta campa. Na e spot unda nan ta actualmente awor na Arashi nan tin 15 aña ta campa na e mesun spot. Prome cu e spot na Arashi, nan tabata campa na Fishermen’s Hut pero pa motibo cu a bin cu Ritz Carlton, nan a keda avisa pa move for di eynan pa motibo cu e hotel lo bin y nan no lo por campa ey mas.
Nan a haya un spot habri y for di e tempo ey a bini y keda tambe. Nan ta un grupo grandi di Sabana Liber, Noord, anto tur aña famia y amistadnan ta bin hunto, cu un grupo di casi 30 hende. Nan ta haci diferente actividadnan hunto manera durante temporada di carnaval y campamento sigur tur aña.
Den campamento nan a realisa na dado momento cu tur mainta hende ta lanta puntra kico ta bay haci. Dus a dicidi di bini hunto y traha un programa pa asina hinca un plan den otro cu diferente actividad. Nan tin henter un buki cu nan a prepara unda tin hasta nan regla y regulacionnan, manera entre otro cu mester respeta cada propiedad di hende, e cumindanan mester sirbi na ora stipula riba schedule, teamwork, y asina hopi otro punto mas.
E grupo ta organisa diferente actividad manera karaoke, competencia di beach volleybal cu hasta copa nan ta parti na e ganadonan. E tradicion aki p’e area aki pa motibo cu no tin verkaveling ainda mescos cu na San Nicolas of Bushiri ta haci poco dificil. Eynan tin verkaveling akinan no, dus e tradicion ta cu nos tin cu bin aki prepara y mustra of señala cu lo bin campa eynan.
Dus prome cu campamento nan ta eynan pa laga sa cu lo tin campamento. “Nos a menciona esaki diferente biaha caba y awe tambe te ainda nos sa di otro luganan cu WEB ta pone meter di awa cerca, pa nos esun di mas cerca ta na parkeerplaats di Arashi,” segun campado Jair Tromp.
Pa gran mayoria e verkaveling ta loke lo por kita hopi dolor di cabes p’e campadonan di e area aki segun Tromp. E famia y amistadnan ta desea tur hende pa disfruta di campamento sanamente. “E ta un tradicion di nos Rubianonan. Lastimamente nos ta ripara cu nos ta keda haya pusha pa bay otro caminda, otro luganan cu cera pa campa nan ta busca otro caminda dus esey kiermen cu nos luga tambe ta bira mas yen.”
